Home / Հայաստան / Սերժ Սարգսյանը կոչ է արել մարտի 1-ի դեպքերի բացահայտման նոր ուղիներ գտնել

Սերժ Սարգսյանը կոչ է արել մարտի 1-ի դեպքերի բացահայտման նոր ուղիներ գտնել

ՀՀ նախագահ Սերժ Սարգսյանն այսօր հրավիրել է խորհրդակցություն`  դատաիրավական բարեփոխումների առանձին հարցերի վերաբերյալ: Ինչպես հաղորդում է ՀՀ նախագահի մամուլի գրասենյակը, այս խորհրդակցությամբ մեկնարկել է քննարկում­ների մի շարք, որն ունե­նալու է հստակ պարբերականություն:

«Քննարկումների նպատակն է` անդրադառնալ դատաիրավական համա­կարգի խնդիրներին, որոշակի լուծումներ գտնել տարիներով ամրապնդված արա­տավոր երևույթ­ների դեմ, բացահայտել խնդիրների հիմքում ընկած հանգամանքները, դրանք շտկել, վերացնել և որ ամենակարևորն է` բացառել այդպիսի երևույթների հետագա կրկնությունները: Ըստ քննարկվող թեմաների` մասնակիցների շրջանակը կարող է փոփոխվել, հարկ եղած դեպքում, կհրավիրվի երրորդ կողմ, նաև` փորձագետներ», – ասված է տարածված հաղորդագրության մեջ:

Խորհրդակցությանը մասնակցել են ՀՀ գլխավոր դատախազ Աղվան Հովսեփյանը, ՀՀ արդարադատության նախարար Հրայր Թովմասյանը, ՀՀ վճռաբեկ դատարանի նախագահ Արման Մկրտումյանը, ՀՀ վճռաբեկ դատարանի քրեական պալատի նախագահ Դավիթ Ավետիսյանը, ՀՀ ԿԱ ԱԱԾ պետ Գորիկ Հակոբյանը,  ՀՀ ԿԱ ոստիկանության պետ Ալիկ Սարգսյանը, ՀՀ գլխավոր դատախազի տեղակալներ Մնացական Սարգսյանը, Արամ Թամազյանը, Գևորգ Կոստանյանը, ՀՀ հատուկ քննչական ծառայության պետ Անդրանիկ Միրզոյանը, ՀՀ ԿԱ ոստիկանության քննչական գլխավոր վարչության պետ Գագիկ Համբարձումյանը, ՀՀ ԿԱ ԱԱԾ քննչական վարչության պետ Մնացական Մարուքյանը:

Հանդիպման ընթացքում Սերժ Սարգսյանն անդրադարձել է 2008թ. մարտի մեկի դեպքերի առիթով հարուցված քրեական գործի ընթացքին. «Բազմիցս ասել եմ և հիմա էլ կրկնում եմ, որ սպասելիքները  շատ են և, առաջին հերթին, խոսքս վերաբերում է մարտի 1-ի դեպքերին: Ակնկալում եմ նոր թափ և ընդգծված ակտիվացում` նշված դեպքերի բացահայտման հարցում: Ես գիտեմ բոլոր խնդիր­ներն ու օբյեկտիվ պրոբլեմները, որ ունեցել ենք մենք բոլորս, նկատի ունեմ՝ իրավապահ մարմինները: Երևի ինձնից լավ որևէ մեկը տեղյակ չէ այդ պրոբլեմներից: Բայց պետք է մեկ անգամ ևս շեշտեմ, որ հարցի նշանակությունը չափազանց մեծ է և´ մեր պետության, և´ մեր հասարակության, և´ նաև տարբեր շահար­կումներից խուսափելու համար: Սա էլ է էական հանգամանք: Անձնապես ինձ համար սա շատ կարևոր հարց է, և ձեզ ուղղված իմ պահանջն է` կրկին և առավել մանրակրկիտ անդրադառնալ նույնիսկ այն հանգամանքներին, որտեղ ըստ ձեզ որևէ նոր բան չի կարող լինել: Փորձեք այդ դեպքերի բացահայտման նոր ուղիներ գտնել: Արդեն տևական ժամանակ է անցել, միգուցե, մարդիկ կան, ովքեր ականատես են եղել և այն ժամանակ չէին ուզում համագործակցել իրավապահ մարմինների հետ, իսկ հիմա այլ մոտեցումներ ունեն: Սա էլ է շատ հնարավոր»,- ասել է Սերժ Սարգսյանը:

Երկրի ղեկավարի խոսքով, չնայած դատաիրավական բարեփոխումների ըն­թաց­քում արձանագրվել են ձեռքբերումներ և անցած ժամանակահատվածում բավականին մեծ աշխատանքներ են կատարվել, այնուամենայնիվ, այդ համակարգի արդյունավետության ապահով­ման խնդիրը չի կարելի համարել լիովին լուծված: Երկրի ղեկավարը նշել է, որ դատաիրավական բարեփոխումների հիմնական ուղղություններից մեկը պետք է հանդիսանա հատկապես դատարանների կողմից օրենքների միատեսակ մեկնաբանությունը և կիրառու­թյունը:

«Դատական պրակտիկայի ուսումնասիրությունը վկայում է, որ մեր օրենսդրական ոչ հստակ կարգավորումների պարագայում օրենսդրության կիրառման պրակտիկան խիստ հակասական է: Ես չեմ ասում, որ սա վերջին մեկ տարում, կամ մի քանի ամիսներին է սկսվել: Այս արատը, ընդհանրապես, միշտ եղել է: Բայց դրա դեմ մենք պետք է շատ լրջորեն պայքարենք, հատկապես ընդունված փոփոխություններից հետո: Այսօր մենք ուղղակի պարտավոր ենք այս պրակտիկան ներդնել բոլոր ատյանի դատարաններում: Մեր իրականության մեջ, ցավոք, այդպիսի որոշումների կայացումն արտառոց երևույթ չէ:  Պետք է հասկանանք, թե պատճառը որն է, որ այս մի դատավճիռը կամ  որոշումը շեղվել է ընդհանուր պրակտիկայից: Երբ  մարդիկ տեսնում են, որ շեղումներ են լինում, բնականաբար, այդ երևույթը երբեք չի կարող նպաստել հենց նույն դատարանների կամ այլ մարմինների հեղինակության բարձրացմանը: Իսկ մեր նպատակներից մեկն էլ այն է, որ մեր իրավապահ մարմիններն ունենան բարձր հեղինակություն: Բարձր հեղինակություն` նշանակում է հանրության կողմից ձեր կայացրած որոշումների ընկալում: Կարծում եմ, որ այս առումով, խնդիրը միայն անկատար օրենսդրության մեջ չէ: Այն, ինչ նկատել ենք, նախ պետք է արագ փոփոխենք, բերենք ճիշտ ձևի»,- ընդգծել է Սերժ Սարգսյանը:

Tekali Taxi