Home / Հայաստան / Գերմանիայում բողոքում են գրասենյակային համբույրներից

Գերմանիայում բողոքում են գրասենյակային համբույրներից

Վարվելակարգի կանոնների գերմանական միությունն աշխատավայրերում ողջույնի համբույրների դեմ է հանդես եկել:

Ինչպես հաղորդում է գերմանական ZDF հեռուստաալիքը, Միության նախագահ Հանս-Միկել Քլայնը հայտարարել է, որ գործընկերների հետ համբուրվելը պրոֆեսիոնալ չէ, բացի դա, այդ փաստը շատերին նյարդայնացնում է:

Քլայնի խոսքով` միայն վերջին տարվա ընթացքում ինքն ավելի քան 50 էլեկտրոնային նամակ է ստացել, որոնցում գերմանական տարբեր քաղաքների գրասենյակային աշխատակիցներ պատմում էին, որ ողջույնի համբույրների թիվն իրենց հաստատություններում զգալիորեն աճել է:

Համբույրներից դժգոհողների կարծիքով` այդ ավանդույթը տարածված է Միջերկրական ծովի երկրներում, ինչպես նաև Լատինական Ամերիկայում, որտեղ զրուցակիցները մեկ ժամվա ընթացքում կարող են մինչև 60 անգամ դիպչել միմյանց, սակայն գերմանացիներին դա հատուկ չէ:

Քլայնը նշել է նաև, որ կանանցից շատերն այդ համբույրի մեջ էրոտիկ ենթատեքստ են տեսնում:

Վարվելակարգի կանոնների միության նախագահի խոսքով` իր կազմակերպությունը ֆորմալ առումով չի կարող համբույրների արգելք պահանջել, բայց կարող է գրասենյակային աշխատակիցներին լավ խորհուրդներ տալ: Քլայնը, մասնավորապես, առաջարկել է այն մարդկանց, ովքեր դեմ չեն համբուրվել, հատուկ հայտարարություն փակցնել աշխատանքային սեղանի վրա:

Tekali Taxi