Գլխավոր / Հայաստան / Հայ հասարակությունը Ադրբեջանի հանդեպ ոչ մի կարծրատիպից չի ձերբազատվել. Վանյան

Հայ հասարակությունը Ադրբեջանի հանդեպ ոչ մի կարծրատիպից չի ձերբազատվել. Վանյան

Հայ հասարակությունը Ադրբեջանի հանդեպ ոչ մի կարծրատիպից չի ձերբազատվել, ընդհակառակը, նորերն են ձևավորվել: Այս մասին ադրբեջանական «Զերկալո» պարբերականի հետ զրույցում հայտարարել է «Կովկասյան խաղաղարար նախաձեռնությունների կենտրոնի» ղեկավար, իրավապաշտպան Գեորգի Վանյանը:

«Ավարտին է մոտենում համագոյակցության փորձ ունեցող և 20 տարվա վաղեմության իրադարձություններին մասնակցած խորհրդային մարդու կյանքի շրջանը: Նրան փոխարինելու է գալիս զոմբիացված երիտասարդությունը` տեղեկատվական պատերազմի դաշտի զինվորների նոր ճամբարը»,- նշել է նա:

Խոսելով Լեռնային Ղարաբաղի հարցում ազգային դիվանագիտության հնարավորությունների մասին` իրավապաշտպանը նշել է, որ ժամանակակից հայ-ադրբեջանական ազգային-դիվանագիտական գործընթացը կրկնօրինակում է քաղաքական բանակցությունները, դառնալով միջազգային պրակտիկայի և դոնոր-կազմակերպությունների պահանջների պաշտոնական շրջանակների նմանակ:

«Իմ ընկալումների համաձայն, մեր հակամարտության պայմաններում ազգային դիվանագիտությունը պետք է նմանակման քաղաքական գործընթացի այլընտրանքն ու հակոտնյա պրոցեսը լինի: Այդ դիվանագիտության արդյունքը պետք է դառնա մեր երկրներում լուսավորության և գործող օրենսդրության կիրառման միջոցով ռասիզմի և այլատյացության բացառումը:

Այդ դիվանագիտության արդյունքը պետք է դառնա հրադադարի ռեժիմը խախտողների պատիժը:

Այդ դիվանագիտության արդյունքը պետք է դառնա հակամարտության արդյունքում բոլոր տուժածների համապատասխան փոխհատուցումը, այդ թվում` այն մարդկանց, որոնց այսօր էլ վնաս է հասցվում, սահմանամերձ գոտու բնակիչներին, զոհվածների ընտանիքներին և հրադադարի ռեժիմի խախտման հետևանքով վիրավորվածներին: Եվ վերջապես, այդ դիվանագիտության արդյունքը պետք է դառնա մեր երկրների քաղաքացիների ազատ տեղաշարժման իրավունքի ապահովումը»,- հայտարարել է Գեորգի Վանյանը:

Tekali Taxi