Գլխավոր / Տեսանյութեր / ՀՀ նախկին վարչպետը համոզված է՝ Ամուլսարի հանքի ծրագիրն օգուտներ կբերի Հայաստանին

ՀՀ նախկին վարչպետը համոզված է՝ Ամուլսարի հանքի ծրագիրն օգուտներ կբերի Հայաստանին

Բրիտանական «Լիդիան ինթերնեյշնլ» ընկերությունը ՀՀ նախկին վարչապետ Արմեն Սարգսյանին տնօրենների խորհրդի անդամ նշանակելու կապակցությամբ հաղորդագրություն է տարածել՝ մեջբերելով նաև Սարգսյանի խոսքերը: Նշենք, որ նշանակման մասին հայտնի էր դարձել 3 օր առաջ:

«Լիդիան ինթերնեյշնլը» Հայաստանում գործող «Գեոթիմ» ընկերության 100% բաժնեմասի սեփականատերն է:

Տարածած մամուլի հաղորդագրության մեջ «Գեոթիմը» նշում է, որ տնօրենների խորհրդի անդամը գործադիր պաշտոն չէ, և «Լիդիանի» տնօրենների խորհրդում կա ևս երեք ոչ գործադիր անդամ:  

«Լիդիան Ինթերնեյշնլի» գլխավոր տնօրեն և նախագահ Թիմ Քոֆլինը ողջունել է Արմեն Սարգսյանի նշանակումը՝ ընդգծելով, որ վերջինիս փորձն ու գիտելիքը կարևոր ներդրում կլինեն ընկերությունում:

«Նրա ներկայությունը Խորհրդում մեզ համար պատիվ է և մեր ընդլայնվող բարձրակարգ թիմի, ինչպես նաև Ամուլսարում միջազգային բարձր կարգի հանքարդյունաբերություն իրականացնելու մեր պատրաստակամության արտացոլումն է: Ծրագրից կշահեն թե՛ ընկերությունը, թե՛ շրջակա համայնքները թե՛ Հայաստանը»,- ասել է Թիմ Քոֆլինը:

Սարգսյանը նույնպես գոհունակություն է հայտնել նշանակման կապակցությամբ:

«Ուրախ եմ Լիդիանի փորձառու տնօրենների խորհրդին միանալու համար և պատրաստ եմ իմ ներդրումն ունենալ ընկերության հիմնական նախագծի՝ Ամուլսարի ծրագրի զարգացմանը: Ես վստահ եմ, որ Ամուլսարը կլինի առաջնակարգ ծրագիր, որը կկառավարվի միջազգային լավագույն փորձի շրջանակներում: Ծրագիրը օգուտներ կբերի Հայաստանին և կապահովի էական ներդրումներ և զգալի ու թափանցիկ եկամուտներ թե՛ բաժնետերերի, թե՛ երկրի համար»,- Լոնդոնի իր գրասենյակից ասել է Արմեն Սարգսյանը, ով ՀՀ վարչապետի պաշտոնը զբաղեցրել է 1996-1997թթ-ին:

Ընկերությունը իր հաղորդագրության մեջ նշում է, որ Հայաստանում Ամուսլարի ոսկու հանքավայրի ծրագրի իրականացման ընթացքում ներդրնելու է ավելի քան 400 մլն ԱՄՆ դոլար, որից մոտավորապես 240-ը՝ հանքի շինարարության փուլում:

«Ամուլսարի ծրագիրը իրականացվում է Էկվադորյան սկբունքների շրջանակներում, որոնք հիմնված են մի շարք միջազգային կազմակերպությունների բնապահպանական և սոցիալական չափանիշների վրա», – նշում է ընկերությունը:

Հիշեցնենք, որ բնապահպանական շարժումները բազմաթիվ անգամ բողոքել են Ամուլսարի հանքի շահագործման դեմ: Դեռևս 2012 թվականի հունիսի 9-ին բնապահպաններն այցելել էին հանքավայր:

Ակցիայի կազմակերպիչները նշել էին, որ հանքի շահագործմամբ վտանգվում է Ջերմուկի՝ որպես առողջարանային քաղաքի բրենդը, ինչպես նաև վտանգվելու են հանքային ջրերի աղբյուրները: Անընդհատ պայթյունների հետևանքով կարող է փոխվել ջրի բաղադրությունը և այդ աղբյուրների ուղղությունը, հանքի փոշին ու թույները կլցվեն Կեչուտի ջրամբար, որտեղից Արփա-Սևան թունելով ջուրը հասնում է Սևանա լիճ:

Բնապահպանների խոսքով՝ հաշվի չի առնվել նաև այն փաստը, որ Ամուլսարից 5 կմ հեռավարության վրա կան ուրանի մեծ պաշարներ: Ըստ հանքայնացված ապարների և հանքանյութերի քիմիական կազմի, հանքավայրում առկա են տոքսիկ տարրեր և փոշու զանգվածի հետ այդ ծանր մետաղները տարածվելու են միջավայրում, իսկ հարակից տարածքները օգտագործվում են որպես արոտավայր:

Ակցիայի մասնակիցները նշել են նաև, որ այդ, ինչպես նաև սեյսմիկ և օրենսդրական ռիսկերը, ոչ միայն չեն ներառվել հանքը շահագործող «Գեոթիմ» ընկերության Շրջակա միջավայրի ազդեցության գնահատման (ՇՄԱԳ) փաստաթղթում, այլև Ջերմուկը առհասարակ չի համարվել ազդակիր տարածք, թեև գտնվում է հանքից ընդամենը 12 կմ հեռավորության վրա:

Հանքի շահագործման դեմ էր արտահայտվել նաև Ջերմուկի քաղաքապետ Վարդան Հովհաննիսյանը, ով բաց նամակով դիմել էր «Գեոթիմ» ընկերությանը:

Tekali Taxi