Home / Հայաստան / Իրանական գազը ռուսաստանյանից թանկ չէ, պնդում է դեսպանը

Իրանական գազը ռուսաստանյանից թանկ չէ, պնդում է դեսպանը

Հայտարարությունները, թե իրանական գազն ավելի թանկ է, քան ռուսաստանյանը, չեն համապատասպանում իրականությանը: Այս մասին հունիսի 4-ին «Ռեգնում» գործակալության հետ զրույցում հայտարարել է Հայաստանում Իրանի դեսպան Մոհամադ Ռեիսին:

Դիվանագետը հիշեցրել է, որ Իրանը Հայաստանի հետ գազը էլեկտրաէներգիայով փոխանակելու համաձայնագիր ունի:

«Իրանական գազն ավելի թանկ չէ ռուսաստանյանից, կարելի ասել, որ գինը նույնն է», – ասել է Ռեիսին:

Պատասխանելով այն հարցին, թե արդյոք իրանական գազը կարող է ռուսաստանյան գազի այլընտրանքը դառնալ Հայաստանի համար, դեսպանն ասել է.

«Ցավոք, երբ կառուցում էին հայ-իրանական գազատարը, որոշեցինք, որ խողովակի տրամագիծը մեծ չի լինելու: Այդ իսկ պատճառով իրանական գազը չի կարող լիովին բավարարել Հայաստանի պահանջները: Այլ դեպքում Իրանը, ունենալով գազի մեծ պաշարներ, կբավարարեր ոչ միայն Հայաստանի, այլ նաև շատ այլ երկրների պահանջները»:

Հիշեցնենք, որ ավելի վաղ ՀՀ վարչապետ Տիգրան Սարգսյանը և ՀՀ էներգետիկայի ու բնական պաշարների նախարար Արմեն Մովսիսյանը հայտարարել էին, որ իրանական գազն ավելի թանկ է:

Մովսիսյանի խոսքով՝ Իրանը առաջարկում է 335 դոլար վճարել 1000 խմ գազի համար, և այդ գինը դեռ աճելու է, այդ իսկ պատճառով ավելի ձեռնտու է ռուսաստանյան գազ գնել:

Նախարարը կարծիք է հայտնել, որ իրանական գազը կարող էր այլընտրանք դառնալ, եթե չլիներ բարձր գինը:

Tekali Taxi