«Հրաժական պահանջելը սովորություն է». Ռուբեն Հայրապետյանը պաշտոնը չի լքի
Հայաստանի ֆուտբոլի ֆեդերացիայի նախագահ Ռուբեն Հայրապետյանը չի պատրաստվում հրաժարական տալ ՀՖՖ նախագահի պաշտոնից: Այս մասին նա ասել է այսօր լրագրողների հետ հանդիպմանը:
«Իսկ ո՞վ է ինձնից հրաժարական պահանջել, որ ես հրաժարական տամ: Էս երկրում սովորություն է դարձել հրաժական պահանջելը: Եթե երկրպագուները չուզենան՝ ես լինեմ, միանշանակ կտամ հրաժարական: Բայց եթե մի քանի մարդ անձնական մղումներով պահանջում է նման բան, դրան անդրադառնալ չեմ ուզում: Ես կխնդրեի այդ մարդկանց վիրտուալ կյանքից դուրս գան, խնդիր չկա, նստենք խոսենք, թող չվախենան, համարձակություն ունենան, ես ոչ մի վատ բան չեմ անում»,- ասել է Հայրապետյանը: Հիշեցնենք, որ երեկ «Ազատություն» ռադիոկայանի հետ զրույցում ՀՖՖ նախագահն ասել էր, որ հրաժարականի ցանկություն ունի:
Անդրադառնալով Դանիայի հավաքականի հետ խաղին (Հայաստանը հաղթեց 4:0 հաշվով)՝ Հայրապետյանն ասել էր, որ ֆուտբոլիստների արածը հերոսություն չէ:
«Հերոսություն չի, եթե հերոսություն ա, մեր շախմատիստներին ի՞նչ պետք է ասենք»,- ասել է Հայրապետյանը:
ՀՖՖ նախագահի խոսքով՝ իր հասցեին ստեր են գրում, օրինակ, թե իբր ինքը Մալթայի հետ խաղը վաճառել է:
«Պատրաստ եմ ամեն ինչ գնելու, այդ թվում՝ նման բաներ ասողներին»,- ասել է Հայրապետյանը:
Ըստ նրա՝ անարդար է, երբ հավաքականի անհաջողությունների մեջ մարդիկ չեն վարանում մեղադրել իրեն, սակայն վրդովվում են, երբ նա միջամտում է հավաքականի այս կամ այն հարցին:
Նա անդրադարձել է 2008-2009 թվականներին Հայաստանի հավաքականի գլխավոր մարզիչ դանիացի Յան Պոուլսենի այն հայտարարությանը, թե Հայրապետյանն իրեն հեռացրել է, քանի որ ցանկացել է միջամտել հավաքականի կազմի ընտրությանը:
ՀՖՖ նախագահի խոսքով՝ Յան Պոուլսենը մեծ ստախոս է: Հայրապետյանը պատմել է, որ ինքը դժգոհություն է հայտնել այն կապակցությամբ, որ մարզիչը խաղադաշտ է դուրս բերել վնասվածք ունեցող ֆուտբոլիստի, ինչին Պոուլսենը պատասխանել է, որ ֆուտբոլիստն իրեն ասել է, թե ի վիճակի է խաղալ:
«Ես էլ ասեցի՝ եթե դուք հավաքականի կազմը որոշում եք ֆուտբոլիստի ցանկությունների համաձայն, ապա դուք հեռացված եք», - ասել է Հայրապետյանը:
Ռուբեն Հայրապետյանը նաև կարծիք է հայտնել, թե հավաքականի գլխավոր մարզիչ Վարդան Մինասյանը բարձրակարգ մասնագետ է, և մի խնդիր ունի՝ լրագորղների հետ շփվելը.
«Նա սխալվել է լրագրողներին թերագնահատելով, և պատասխանները ստացվել են ոչ կոռեկտ» , - ասել է Հայրապետյանը՝ նկատի ունենալով Չեխիայի խաղից հետո Մինասյանի մամուլի ասուլիսը, երբ վերջինս պատասխանելով Հայաստանի հավաքականի՝ Աշխարհի գավաթում հայտնվելու շանսերի մասին հայտարարել էր. «Իսկ ո՞վ է ասել, որ մենք Բրազիլիա ենք գնալու: Դուք ինձանից նման բան լսե՞լ եք»:
