Սերբ ռեժիսոր Սրջան Դրագոևիչի «Պարադա» ֆիլմը վերջին 10 տարիների ընթացքում նկարահանված լավագույն կատակերգություններից մեկն է: Այս մասին սեպտեմբերի 5-ին «Մեդիա կենտրոնում» «Պարադա» ֆիլմի ցուցադրությանը հաջորդած քննարկման ժամանակ հայտարարել է կինոքննադատ Րաֆֆի Մովսիսյանը: Հիշեցնենք, որ նախորդ տարի ֆիլմի ցուցադրությունը Հայաստանում նախաձեռնել էին ԵՄ և Գերմանիայի դեսպանները, ինչի դեմ բողոքել էին ազգայնական խմբերը, որոնք ֆիլմի ցուցադրությունը «միասեռականության անբարո քարոզ են» անվանել և պայքարել դրա դեմ՝ ճնշում գործադրելով ֆիլմի ցուցադրության համար դահլիճ տրամադրած կազմակերպություններին: ԵՄ դեսպան Տրայան Հրիստեան հայտարարել էր, «Parada»-ն կատակերգություն է, որի հերոսները նույնասեռականներ են, սակայն ֆիլմը որևէ տեսակետ կամ կոչ չի պարունակում: Ֆիլմը հետագայում ցուցադրել են Վանաձորում:
Սեպտեմբերի 5-ի քննարկման ժամանակ Մովսիսյանն ասել է, որ Սրջան Դրագոևիչը հիմնականում նկարահանել է փոքր բյուջեով, պատմական ժանրի ֆիլմեր և սա դեռևս այն ֆիլմն է, որ նրան ամենամեծ համբավը բերեց, թե´ փառատոնների շրջանակում, թե´ որպես դրամարկղային ֆիլմ:
«Սրջան Դրագոևիչը այսպես կոչված «բալկանյան» ոճի ակնառու ներկայացուցիչներից է: Նա կարծես ասի. եվրոպացինե´ր, դուք սերբերի մասին ունեք որոշակի կարծրատիպեր: Հիմա մենք ձեզ ցույց կտանք այդ կարծրատիպերը, բայց` ցույց կտանք ավելի ծայրահեղացված ձևով», – ֆիլմը մեկնաբանել է քննարկման մասնակից մշակութաբան Վարդան Ջալոյանը:
«Մեդիա կենտրոնն» իր հաղորդագրության մեջ նշում է, որ քննարկման մեկ այլ մասնակից, ՄԱԿ Հանրային տեղեկատվության վարչության ներկայացուցիչ Մարիա Դոցենկոն ափսոսանք է հայտնել, որ հանդիսատեսը քիչ էր, և ցուցադրությունը փակ էր հանրության համար, քանի որ «ֆիլմն իրոք լավն է և կարևոր թեմայի է անդրադառնում»:
«Ինչպես գիտենք ԼԳԲՏ խնդիրների շուրջ ձևավորված հանրային վերաբերմունքը Հայաստանում դեռևս խիստ վիճելի է, այս ոլորտում շատ է կողմնակալությունը, որը կարող է լուծվել միայն հանրային երկխոսության, քննարկման միջոցով», – կարծիք է հայտնել Մարիա Դոցենկոն:
Ֆիլմը «Մեդիա կենտրոն»-ին ցուցադրության համար տրամադրել է Հայաստանում Եվրոպական միության պատվիրակությունը: