Սևազգեստ մայրերը ակցիա անցկացրեցին Հրապարակի կենտրոնում (ՏԵՍԱՆՅՈՒԹ)

Կառավարության մոտ ամեն հինգշաբթի բողոքի ակցիա անցկացնող բանակում խաղաղ պայմաններում զոհված զինծառայողների մայրերն այսօր իրենց ակցիան որոշել են անցկացնել ոչ թե Կառավարության շենքի դիմաց, այլ Հանրապետության հրապարակի կենտրոնում:

4 կանայք կանգնել են հրապարակի կենտրոնում՝ գորգի վրա, և հայտարարել, որ այսօրվանից իրենք փոխում են ավանդույթը և այսուհետ այլ կերպ են շարունակելու պայքարել: Նրանց խոսքով՝ կառավարության մոտ պարզապես կանգնելը ոչ մի արդյունքի չի բերել, քանի որ իրենք շարունակում են անուշադրության մատնվել պաշտոնյաների կողմից, իսկ իրենց զոհված որդիների գործերը ճշմարտացի լուծում չեն ստանում: Հրապարակի կենտրոնում և հետագայում նախագահական նստավայրի մոտ ակցիա անցկացնելը, ծնողների խոսքով, կօգնի ուշադրություն հրավիրել իրենց խնդիրների վրա:

Անահիտ Մկրտչյանին, Իրինա Ղազարյանին, Նանա Մուրադյանին և Գոհար Սարգսյանին հետագայում միացել են վերջինիս ամուսինը՝ Սուրեն Օհանջանյանը, և ակտիվիստ Վարդգես Գասպարին: Ոստիկանները նրանց հորդորել են հեռանալ Հրապարակի գորգից, սակայն ակցիայի մասնակիցները հրաժարվել են: Ավելի ուշ ՀՀ կառավարության շենքին են մոտեցել ազատամարտիկները, ովքեր պահանջում են ազատ արձակել ազատամարտիկների շարժման ղեկավարներից մեկին՝ Վոլոդյա Ավետիսյանին: Սևազգեստ մայրերը միացել են ազատամարտիկներին: