«Եկեք կանխենք գազի թանկացումը» նախաձեռնության անդամներն այսօր բողոքի ակցիա են անցկացրել կառավաության շենքի մոտ, ապա երթով շարժվել դեպի Սարյան փողոցում գտնվող Հանրային ծառայությունները կարգավորող հանձնաժողովի (ՀԾԿՀ) շենք:
Ակցիայի համար հիմք էր հանդիսացել հոկտեմբերի 2-ին Ազգային Ժողովի ամբիոնից ՀԱԿ պատգամավոր Արամ Մանուկյանի հարցը, թե շուրջ 6 ամիս է՝ իրեն չեն տրամադրում գազի սակագնի թանկացման պայմանագիրը: ՀՀ վարչապետ Տիգրան Սարգսյանը պատասխանեել էր, որ նման պայմանագիր չկա, դեռ բանակցային փուլում է, ստորագրվելու դեպքում դրա մասին տեղյակ կլինեն բոլորը: ԱԺ-ում կայացած զրույցից մեկ օր անց Տիգրան Սարգսյանը զանգահարել է Արամ Մանուկյանին: Վերջինիս խոսքով՝ այս անգամ վարչապետը նշել էր, որ պայմանագիր կա երկու սուբյեկտի միջև՝ ռուսասաստանյան կողմի և «Հայռուսգազարդ»-ի:
Ակցիայի մասնակիցներին վրդովվեցրել է այն փաստը, որ իրենք պայմանագիրը չեն տեսել: Նրանց խոսքով՝ շուրջ 3 ամիս է՝ ժողովրդից խաբեությամբ գումար են գողանում պետական մակարդակով:
«Չկա պայմանագիր, ուստի՝ ինչի հիման վրա է «Հայռուսգազարդ»-ը դիմել ՀԾԿՀ-ին գինը թանկացնելու համար, և ինչ հիմքով է տվյալ հայտն ընդունվել ՀԾԿՀ-ի կողմից և ինչու է թանկացել գազի և էլեկտրաէներգիայի սակագինը», – բարձրախոսով հայտարարել է ակտիվիստ, մասնագիտությամբ իրավաբան Արգիշտի Կիվիրյանը:
Ակցիայի մասնակից, ՀՀ նախագահի նախկին թեկնածու Անդրիաս Ղուկասյանը Еpress.am-ի հետ զրույցում նշել է, թե ՀՔԿՀ-ի որոշումը բողոքարկվել է, գործը դատարանում է, սակայն որևէ առաջխաղացում չկա:
«Համապատասխան որոշումներ ընդունելու վերաբերյալ դատարանը սպառել է օրենքով սահմանված ժամկետները: Քաղաքացիների պահանջը բնական է՝ ստվերային վիճակից քննարկվող խնդիրը պետք է դուրս գա, և ինչո՞ւ են ՀՀ քաղաքացիներն այսօր ավել գնով վճարում գազի դիմաց: Քաղաքացիներն իրավունք ունեն պահանջել իրենց կենսական շահերին վերաբերող կարևոր հարցի մեջ հստակ տեղեկություն, որովհետև ժողովրդի մեջքի հետևում գործարքներ են կնքում և ժողովրդին փաստի առաջ են կանգնեցնում», – ասել է Ղուկասյանը:
Ակցիայի մասնակիցները նաև հայտարարել են, որ հստակ պատասխաններ չստանալու դեպքում իրենք կդիմեն անհնազանդության, իսկ գազի և էլեկտրաէներգիայի համար կսկսեն վճարել նախկին սակագնով: