Աշոտյանը հրաժարվել է տրամադրել արտագաղթի ուսումնասիրության մասին տվյալները

Արտագաղթի ուսումնասիրության արդյունքերը հրապարակման ենթակա չեն։ Այս մասին «Հայկական ժամանակ» օրաթերթին հայտնել են Կրթության և գիտության նախարարությունից։

Թերթը նշում է, որ փետրվարի 6-ին Կրթության և գիտության նախարար Արմեն Աշոտյանին խնդրել էր տրամադրել ՀՀ ԿԳՆ գիտության պետական կոմիտեի կողմից Հայ-ռուսական համալսարանին պատվիրած՝ արտագաղթի ուսումնասիրության արդյունքները, որոնք, ըստ համալսարանի և պատվիրատուի միջև կնքված պայմանագրի, պետք է հրապարակվեին այս տարվա հունվարի 24-ին։

2013 թվականին արտագաղթի պատճառներն ուսումնասիրելու համար պետբյուջեից 13 միլիոն դրամ էր հատկացվել։

Արմեն Աշոտյանից թերթը երեկ հետևյալ պատասխանն է ստացել.

«Ի պատասխան ձեր 06.02.2014թ. հարցման՝ հայտնում եմ, որ ԿԳՆ գիտության պետական կոմիտեի կողմից Հայ-ռուսական (սլավոնական) համալսարանի հետ գիտական և գիտատեխնիկական գործունեության նպատակային-ծրագրային ֆինանսավորման պետական ծրագրի իրականացման համար պետության կողմից դրամաշնորհի ձևով տրամադրվող ֆինանսական աջակցության գումարների օգտագործման մասին կնքված պայմանագրով կատարված ուսումնասիրման արդյունքների հրապարակում նախատեսված չէ»։

Մանրամասները՝ թերթի այսօրվա համարում