Վրաստանի արդարադատության նախարար Թեա Ծուլուկիանին չի շտապում ստորագրել գործարար Աշոտ Սուքիասյանի (լուսանկարում՝ ձախից) արտահանձնման որոշում: «Հետքի» հետ զրույցում Վրաստանի արդարադատության նախարարի մամուլի խոսնակ Մարիան Մսխիլաձեն հայտնել է, որ նախարարը դեռևս ժամանակ ունի, և դեռ չի լրացել այն ժամկետը, որի ընթացքում նախարարը պետք է ստորագրի Աշոտ Սուքիասյանի արտահանձման որոշումը:
«Նախարարն ասաց, որ ինքը դեռևս ժամանակ ունի և չի շտապում, և ոչ ոք այդ գործընթացը չի արագացնում»,- ասել է մամլո խոսնակը՝ հավելելով, որ հայտնի չէ, թե երբ կստորագրվի կամ կստորագրվի այդ որոշումը, թե ոչ:
«Օֆշորային սկանդալի» հերոս, գործարար Աշոտ Սուքիասյանը ձերբակալվել էր հունվարի 31-ին Թբիլիսիում։ Ապրիլի 15-ին Թբիլիսիի կենտրոնական դատարանը նրան Հայաստան արտահանձնելու որոշում էր կայացրել:
Աշոտ Սուքիասյանը, ով Նավասարդ Կճոյանի սանիկն է, հետախուզման մեջ էր, նա անցնում է գործարար Փայլակ Հայրապետյանի գործով: Սուքիասյանը մեղադրվում է առանձնապես խոշոր չափերով խարդախության, խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու և հանցավոր ճանապարհով ստացված առանձնապես խոշոր չափերով եկամուտներն օրինականացնելու մեջ:
Ավելի վաղ hetq.am-ը փաստաթուղթ էր հրապարակել, համաձայն որի Սուքիասյանը, Սարգսյանն ու Կճոյանը օֆշորային ընկերության սեփականատերեր են: Հետագայում Սուքիասյանը օֆշորային սկանդալմն իր վրա էր վերցրել՝ հայտարարելով, որ առանց Տիգրան Սարգսյանի և Նավասարդ Կճոյանի գիտության նրանց անունով Wlispera Holdings Limited օֆշորային ընկերությունն է գրանցել Կիպրոսում: