Epress.am Լուրեր Հայաստանից
Կենտրոն և Նորք-Մարաշ վարչական շրջանների ընդհանուր իրավասության դատարանի դիմաց Շանթ Հարությունյանի աջակիցների կողմից անցկացված ակցիայի ժամանակ ոմն Հայկ Կյուրեղյանը կրակել է ոստիկանների ուղղությամբ:
Այսօր Կենտրոն և Նորք-Մարաշ վարչական շրջանների ընդհանուր իրավասության դատարանի դիմաց բողոքի ակցիա են անցկացրել մի խումբ քաղաքացիներ՝ պահանջելով ազատ արձակել Շանթ Հարությունյանին ու մյուս քաղբանտարկյալներին: Կեսօրին դատարանում մեկնարկել էր քաղբանտարկյալների գործով առաջին նիստը:
Ինչպես հայտնում է Epress.am-ի թղթակիցը, ակցիային մասնակցում էին «Ազատություն քաղբանտարկյալներին» նախաձեռնության անդամները, ինչպես նաև «Ժառանգություն» կուսակցության նախագահ Րաֆֆի Հովհաննիսյանը:
Epress.am-ի հետ զրույցում Հայկ Կյուրեղյան ներկայացած անձը հայտարարել է, որ նա կխոչընդոտի Հարությունյանի ազատազրկումը, և դա անելու է օդաճնշական ատրճանակի և նռնակի օգնությամբ:
Երիտասարդը բարձրացել է դատարանի շենքի առջև տեղակայված ավտոմեքենաներից մեկի վրա և կրակ բացել ոստիկանների ուղղությամբ: Այնուհետև Կյուրեղյանը գրպանից հանել է նռնակը և սպառնացել, որ իրեն մոտենալու դեպքում, նա կպայթեցնի այն: Լրագրողների հետ զրույցում տղամարդն ասել է, որ իրեն ձերբակալելու պարագայում ինքը, ազատության մեջ հայտնվելուն պես, կդիմի «իսկական» զենքի օգնության:
Ոստիկաններից մի քանիսը մարմնական թեթև վնասվածքներ են ստացել:
Ներկաների պնդել են, որ երիտասարդին չեն ճանաչում և երբեք չեն տեսել նրան ակցիաների ժամանակ:
Ոստիկանության պաշտոնական կայքի հաղորդագրության համաձայն՝ կան վիրավոր ոստիկաններ, որոնք տեղափոխվել են հիվանդանոց, իսկ Հայկ Կ.-ն բերման է ենթարկվել ոստիկանության Կենտրոնական բաժին: Ատրճանակն առգրավվել է, հանգամանքները պարզվում են: Փաստի առթիվ քրեական գործ է հարուցվել ՀՀ քրեական օրենսգրքի 258 հոդվածի 4-րդ մասի հատկանիշներով: Հայկ Կ.-ն ձերբակալված է:
Մանրամասները` Epress.am-ի տեսանյութում: