Home / Հայաստան / Տավուշի մարզպետը պնդում է՝ եկեղեցում պատկերված առաքյալն իրեն նման չէ

Տավուշի մարզպետը պնդում է՝ եկեղեցում պատկերված առաքյալն իրեն նման չէ

Տավուշի մարզպետ Հովիկ Աբովյանը չգիտի, թե ում նախաձեռնությունն է Կողբ գյուղի Սուրբ Հովհաննես եկեղեցու «Խորհրդավոր ընթրիք»-ը կրկնօրինակող սրբապատկերի վրա առաքյալներից մեկին իր դիմանկարով պատկերել։

Այս մասին նա հայտարարել է «Հայկական ժամանակ» օրաթերթի հետ զրույցում։

«Ես չգիտեմ՝ ում նախաձեռնությունն է։ Ես շինարարությունն արել, տվել եմ, դրանից հետո իրենք են այդ նկարներն արել։ Նկարչին հարցրեք… Բայց նկարները լրիվ տարբեր նկարներ են, թե հիմա ով ում է նմանացնում, ես չեմ կարող ասել, ի՞նչ ասեմ։ Կոնկրետ անողը կա, կարող եք հետը խոսել», – ասել է Աբովյանը։ «ՀԺ»-ի հետ զրույցի ընթացքում նա պնդել է, որ ինքը նկարների մեջ նմանություն չի տեսնում։

Պատկերում՝ Աբովյանը ձախից երկրորդը

koghb1

Մարզպետը հավելել է, որ «նկարը կա, ով ուզում է, թող գա, նայի, չես էլ կարող պոկել, պատի մեջ սարքած է, պատը պիտի քանդես»։

Լրագրողի այն հարցին, թե ինչ միջոցներով է Աբովյանը կառուցել Կողբի եկեղեցին, մարզպետը պատասխանել է․

«Հիմա ի՞նչ կարևոր է՝ ում միջոցներով է կառուցվել։ Ընկերության միջոցներով ենք կառուցել։ Ընկերներով հավաքվել ենք, ամեն մեկն իր հնարավորությունները ներդրել է կառուցել ենք։ Եթե վատ բան ենք արել, գրեք, որ վատ բան են արել, եկեղեցի են կառուցել»։

Slaq.am կայքը զրուցել է նկարի հեղինակի՝ Անդրանիկ Անտոնյանի հետ, ով ասել է, թե իր նախաձեռնությամբ է առաքյալներից մեկին պատկերել մարզպետի դիմագծերով.

«Ես ուզում էի անակնկալ անել, Աբովյանն ի սկզբանե տեղյակ չէր դրանից, հետո մեծ աղմուկ բարձրացավ և մարզպետն ասաց, որ փոխեմ նկարը: Այժմ եկեղեցում տեղադրված «Խորհրդավոր ընթրիք» նկարում մարզպետը չկա»:

Անդրանիկ Անտոնյանի խոսքով՝ մարզպետն արժանի էր լինել առաքյալների շարքում: Նկարչի ասածը, փաստորեն, հակասում է Հովիկ Աբովյանի խոսքին, ով պնդում է, թե նկարը նման չէ, բացի դա, այն հնարավոր չէ փոխել։

Մարզպետի հետ զրույցն ամբողջությամբ՝ «Հայկական ժամանակ» օրաթերթի այսօրվա համարում