Home / Հայաստան / Ադրբեջանական դիվերսիոն խմբի անդամները ռազմագերիներ չեն․ ՀՀ ՊՆ

Ադրբեջանական դիվերսիոն խմբի անդամները ռազմագերիներ չեն․ ՀՀ ՊՆ

Ադրբեջանի ղեկավարությունը փորձեր է ձեռնարկում հրաժարվել անցյալ շաբաթվա վերջին վնասազերծված ադրբեջանական դիվերսիոն խմբի գերեվարված անդամներից՝ միաժամանակ ջանալով, որ նրանց տրվի ռազմագերիների կարգավիճակ, սակայն տվյալ պարագայում դա անհնարին է, քանզի «Ռազմագերիների հետ վարվելակերպի մասին» Ժնևի կոնվենցիայի 4-րդ հոդվածը հստակ սահմանում է այն անձանց, որոնց կարող է տրվել ռազմագերու կարգավիճակ։ Այս մասին տարածած հաղորդագրության մեջ հայտարարում է ՀՀ Պաշտպանության նախարարությունը։

«Առկա են անհերքելի ապացույցներ, որ իրականում գործ ունենք հանցավոր խմբի հետ, որը հավաքագրվել և դիվերսիոն նպատակներով օգտագործվել է ադրբեջանական իշխանությունների կողմից: Վնասազերծված դիվերսիոն խմբի անդամները չեն ունեցել որևիցէ տարբերանշան և կոպտորեն խախտել են միջազգային իրավունքով սահմանված պատերազմի օրենքներն ու սովորույթները` դաժան ու անմարդկային կերպով ոտնձգություն իրականացնելով քաղաքացիական բնակչության նկատմամբ:

Վնասազերծված դիվերսիոն խմբի հանցավոր գործունեության համար` պետության տարածքի ապօրինի հատում, սպանություն և սպանության փորձ, հատուկ պահպանվող տարածքների ապօրինի նկարահանման փորձեր և այլն, քրեական օրենսդրությամբ նախատեսված են հստակ պատիժներ: Ուստի, նրանց նկատմամբ քրեական հետապնդում կիրականացվի քրեական օրենսդրությամբ նախատեսված ընդհանուր կարգով` արդար դատաքննության և Մարդու իրավունքների պաշտպանության համընդհանուր միջազգային իրավունքի սկզբունքների պահպանմամբ: Անհրաժեշտության դեպքում նշված անհերքելի ապացույցները կարող են ներկայացվել շահագրգիռ միջազգային կառույցներին», – ասված է ՊՆ-ի պաշտոնական հայտարարության մեջ:

Լուսանկարում՝ խմբի անդամներից մեկը՝ Շահբազ Ջալալօղլու Գուլիևը

Tekali Taxi