Epress.am Լուրեր Հայաստանից
Գյումրիում նորածնի առք ու վաճառքի դեպքի առթիվ հարուցված քրեական գործի շրջանակներում մեղադրանք է առաջադրվել նորածնի մորը՝ երեխային վաճառելու, և Շիրակի մարզի մի բնակչի ՝ երեխային գնելու համար: Այս մասին հայտնում է ՀՀ քննչական կոմիտեի լրատվական ծառայությունից։
Նախաքննությամբ պարզվել է, որ Գյումրիի 25-ամյա բնակչուհին, լինելով հղի, դեռեւս 2014 թվականի մայիսին նախապես պայմանավորվել է երեխայի ծնվելուց հետո նրան հանձնել Շիրակի մարզի մի ամուսնական զույգի, որը երկար տարիների համատեղ կյանքի ընթացքում երեխա չի ունեցել։ Ըստ քրեական գործի տվյալների՝ նորածնի մայրը երեխային 1000 դոլարով վաճառելու մասին պայմանավորվել է ընտանիքի հոր հետ։
2014 թվականի սեպտեմբերի 18-ին կինը ծննդաբերել է, և պայմանավորվածության համաձայն՝ տղամարդը ՔԿԱԳ Գյումրու տարածքային բաժնում ճանաչել է նորածնի հայրությունը, իսկ 2014 թվականի սեպտեմբերի 20-ին՝ հիվանդանոցից դուրս գրվելուց հետո, երեխայի մայրը նորածնին հանձնել է նրա հայրությունը ճանաչած տղամարդուն՝ գումարը հետագայում վճարելու պայմանով։
Նախաքննությունը շարունակվում է: