«Սասնա ծռերի» անդամը մաշկային լուրջ հիվանդություն ունի․ նրան օգնություն չեն ցուցաբերում․ փաստաբան

«Սասնա ծռեր» խմբի անդամ Արթուր Սողոմոնյանի առողջական վիճակը ծանր է, սակայն նրան բուժօգնություն չեն ցուցաբերում։ Այս մասին Еpress.am-ի հետ զրույցում ասել է Սողոմոնյանի պաշտպան Մուշեղ Շուշանյանը։ Նա պատմել է, որ 2016 թվականի օգոստոսին «Նուբարաշեն» ՔԿՀ տեղափոխվելուց հետո Սողոմոնյանի մոտ առողջական խնդիրներ են ի հայտ եկել, ինչի հետևանքով նրա դեմքին և գլխին թարախաբշտիկներ են առաջանում։ Այժմ նա ուժեղ գլխացավեր ունի, նրա մոտ մազաթափություն է սկսել։

Շուշանյանը նշել է, որ հիվանդության առաջացումից ի վեր Սողոմոնյանը բուժօգնություն է պահանջել, սակայն մինչև այսօր նրան պատշաճ կերպով չեն օգնել։

«Խնդրի մասին ինքն ինձ տեղեկացրել է նոյեմբերի վերջին, որից հետո ես դիմում եմ ներկայացրել ՔԿՀ պետին ու պահանջել բուժօգնություն ցուցաբերել ու ինձ տրամադրել բժշկական քարտի պատճենը։ Այդ քարտից երևում է, որ օգոստոսի12-ին Սողոմոնյանի մոտ արդեն ախտորոշվել է ֆուրոնկուլյոզ մաշկային հիվանդությունը։ Բայց միայն նոյեմբերին՝ մեր դիմելուց հետո, ՔԿՀ-ում նրան այցելել է մաշկաբանը և առաջարկել է հակաբիոտիկ ներարկել, ինչից սկզբում Սողոմոնյանը հրաժարվել է՝ ասելով, որ չի վստահում ո՛չ բուժանձնակազմին, ո՛չ էլ նրանց նշանակած բուժմանը։ Նա նշել է, որ միայն փաստաբանի հետ խորհրդակցելուց հետո կընդունի այդ դեղերը»,- ասել է Շուշանյանը։

Մասնագետները Շուշանյանի հետ զրույցում հայտնել են, որ այդ հիվանդության համար պետք է շտապ հետազոտություն անցկացնել և լաբորատոր պայմաններում պարզել, թե որ հակաբիոտիկներն են այդ բակտերիայի վրա ազդում, որից հետո միայն կարելի է դրանք նշանակել։

«Մենք մի քանի անգամ պահանջել ենք անցկացնել այդ հետազոտությունը։ Մինչ դա, մասնագետի թույլտվությամբ խորհուրդ տվեցի, որ ընդունի հակաբիոտիկները։ 5 օր շարունակ նրան օրը 2 ասեղ ներարկում են արել, որից ոչ մի օգուտ չի եղել։ Իսկ վերջին շրջանում նրա վիճակն ավելի է վատացել ու մի քանի օր առաջ թարախային բշտիկներից մեկը դնչի հատվածում մեծացել ու պայթել է, միջից թարախ ու արյուն է եկել, բայց անգամ այդ դեպքում նրան բուժօգնություն չեն ցուցաբերել»,- ասել է Շուշանյանը։

Փաստաբանի խոսքով՝ նման վիճակը կարող է ծանր հետևանքների հանգեցնել և արյան վարակի պատճառ դառնալ։

Նշենք, որ Armtimes.com-ի հետ զրույցում Քրեակատարողական վարչության հանրային կապերի բաժնի պետ Գոռ Ղլեչյանն ասել էր, որ Սողոմոնյանի վիճակը գնահատվում է բավարար և Սողոմոնյանն ինքն է հրաժարվել բուժօգնությունից։

Փաստաբանը Epress.am֊ին ասել է, որ Ղլեչյանի ասածը ապատեղեկատվություն է․ Սողոմոնյանը միայն մեկ անգամ է հրաժարվել բուժօգնությունց, որը պատճառաբանված է եղել ու մասնագետի հետ խորհրդակցելուց հետո ստացել է առաջարկվող ներարկումները․ «Փաստը նա է, որ 5 օր հակաբիոտիկ ներարկելուց բացի, նրան ոչ մի բուժօգնություն չի ցուցաբերվել»։