Գեզիի գործով քաղբանտարկյալները կպակասեն իննով

Ավելի քան երկու տարվա ազատազրկումից հետո ձեռնարկատեր և հովանավոր Օսման Կավալան ազատ կարձակվի, գրում  է «Ազատություն Օսման Կավալային» ֆեյսբուքյան էջը։

https://www.facebook.com/FreeOsmanKavala/posts/1127404477591863

Ստամբուլի ծանր հանցագործությունների 30-րդ դատարանն այսօր Գեզիի գործով մեղադրվող 16 ցուցարարներից իննին անմեղ ճանաչեց։ Նրանց թվում էր նաև Օսման Կավալան, ում ցմահ ազատազրկում էր սպառնում։

Կավալան ու ընկերները մեղադրվում էին 2013-ին Գեզի այգու բողոքի ակցիան կազմակերպելու և հակակառավարական գործունեություն ծավալելու մեջ։

Գեզիի ցույցերը տեղի են ունեցել 2013 թվականին։ Ցուցարարները փորձում էին կանխել կառավարության առաջարկած զարգացման ծրագրի շրջանակներում Թաքսիմում նախատեսվող ծառահատումները։ Ցույցի ընթացքում սպանվել է ութ ցուցարար և մեկ ոստիկան:

Կավալան նաև մեղադրվում է «Գյուլենական ահաբեկչական խմբավորման» հետ կապեր ունենալու մեջ։

2019 թվականի սեպտեմբերի 7-ին 62-ամյա ձեռնարկատերը պարգևատրվել էր Եվրոպական հնագիտական ժառանգության մրցանակով՝ Թուրքիայում մշակութային ժառանգության պահպանության ու պաշտպանության գործում իր մեծ ներդրման համար։