25 տարի անազատության մեջ գտնվող ցմահ դատապարտյալն ազատ արձակվեց

Արմավիրի մարզի ընդհանուր իրավասության դատարանի դատավոր Արմեն Հովհաննիսյանի որոշմամբ ցմահ ազատազրկված Ստեփան Գրիգորյանն այսօր պայմանական վաղաժամկետ ազատ արձակվեց, հայտնում է Հայաստանի Հելսինկյան կոմիտեն։

Ստեփան Գրիգորյանը, հիշեցնենք, շուրջ 25 տարի պատիժ էր կրում բանտում: 1997 թ. դեկտեմբերի 25-ին Գերագույն դատարանի դատավճռով նա դատապարտվել էր մահապատժի՝ սպանությանը մասնակցելու համար, իսկ 2003 թ. օգոստոսի 1-ին նախագահի հրամանագրով նրան ներում էր շնորհվել և մահապատիժը փոխարինվել էր ցմահ ազատազրկմամբ: 2017 թվականից Գրիգորյանը սպասում էր պայմանական վաղաժամկետ ազատմանը:

Եվ պրոբացիայի, և քրեակատարողական ծառայությունները նրա վաղաժամկետ ազատ արձակման վերաբերյալ տվել էին դրական կարծիքներ։