Home / Բանակ / Նախկին զինվորական պատգամավորը մեղադրվում էր զինվորից կաշառք ստանալու մեջ

Նախկին զինվորական պատգամավորը մեղադրվում էր զինվորից կաշառք ստանալու մեջ

Ղարաբաղի նոր գումարման Ազգային ժողովի պաշտպանության, անվտանգության ու օրինապահության հարցերի մշտական հանձնաժողովի նախագահ է դարձել Սամվել Բաբայանի ղեկավարած «Միասնական հայրենիք» կուսակցության անդամ Սեյրան Հայրապետյանը:

Սեյրան Հայրապետյանը,  civilnet.am լրատվականի հաղորդմամբ, 2016 թվականին ներգրավված է եղել ոլորտին առնչվող կոռուպցիոն մի քրգործի մեջ՝ մեղադրյալի կարգավիճակում։

«Դատալեքս» տեղեկատվական համակարգի տվյալներով, որ Հայրապետյանը՝ լինելով Ղարաբաղի զինկոմիսարիատի պահեստազորի սպաների հաշվառման բաժնի պետ, պայմանավորվածության է եկել Երևանի բնակիչներ Գուրգեն Ավետիսյանի և նրա կնոջ հետ՝ վերջիններիս որդուն զինծառայության ընթացքում մարտական հերթապահություն կրող ստորաբաժանումների կազմում չընդգրկելու շուրջ։ 2014-ին «Արցախբանկ»-ի միջոցով Հայրապետյանը ստացել է 200 դոլար և 80 000 դրամ։

Գործը հարուցվել է 2016-ի դեկտեմբերին՝ Հայաստանի ռազմական ոստիկանության պետի հրամանով, հետագայում փոխանցվել է Քննչական կոմիտեի զինվորական գլխավոր վարչությանը։ 2018-ի հունիսին գործը մեղադրական եզրակացությամբ ուղարկվել է Սյունիքի մարզի ընդհանուր իրավասության դատարան։ Գործի քննությունը, սակայն, ձգձգվել է՝ դատավորը արձակուրդում է եղել, հետո վերադարձել է, նրա լիազորությունները դադարեցվել են, գործը մակագրվել է այլ դատավորի, մի քանի նիստերից հետո մեղադրողը չի ներկայացել և այլն։ Ի վերջո 2020-ի հունվարին դատարանը որոշել է ամբաստանյալի նկատմամբ քրեական հետապնդումը դադարեցնել, քրգործն էլ կարճել՝ վաղեմության ժամկետն անցնելու հիմքով։

Հայրապետյանը նոր գումարման Ազգային ժողով է անցել Ղարաբաղի Անվտանգության խորհրդի նորանշանակ քարտուղար Սամվել Բաբայանի «Միասնական հայրենիք» կուսակցության ցուցակներով։ Պաշտպանության, անվտանգության ու օրինապահության հարցերի հանձնաժողովի նախագահ է ընտրվել պատգամավորների 25 կողմ, 8 դեմ ձայների հարաբերակցությամբ։

Tekali Taxi