ՏԻՄ ընտրություններ․ Կապան հաղթել «Շանթը», Ստեփանավանում և Իջևանում՝ ՔՊ-ն

Կապանում, Ստեփանավանում և Իջևանում երեկ տեղական ինքնակառավարման մարմինների ընտրություններ էին։

Կենտրոնական ընտրական հանձնաժողովի նախնական տվյալների համաձայն՝

— Կապանում հաղթել է գործող քաղաքապետ Գևորգ Փարսյանի գլխավորած «Շանթ դաշինք» ազգային կուսակցությունը` ձայների կրկնակի առավելությամբ առաջ անցնելով «Քաղաքացիական պայմանագրից»: «Շանթը» ստացել է ձայների մոտ 69․5 տոկոսը՝ 13 հազար 962 քվե, «Քաղացիական պայմանագիր»-ը՝ մոտ 28․8 տոկոսը՝ 5 հազար 791 ձայն։

Ընտրություններին մասնակցել է ընտրողների ավելի քան 63 տոկոսը։

— Ստեփանավանում «Քաղացիական պայմանագիր»-ը ստացել է քվեների 78,4 տոկոսը՝ 4004 ձայն, «Բարգավաճ Հայաստան»-ը՝ 705 ձայն (մոտ 13,8 տոկոս), Հայ ազգային կոնգրեսը՝ 218 (մոտ 4 տոկոս):

ՔՊ ցուցակը գլխավորում է համայնքի ղեկավարի գործող ժ/պ Արմեն Գրիգորյանը։

Քվեարկությանը մասնակցել է ընտրողների 38.30 տոկոսը։

— Իջևանում «Քաղացիական պայմանագիր»-ը հաղթել է մոտ 80,8 տոկոսով՝ ստանալով 10 003 ձայն, երկրորդ տեղում ՀՅ Դաշնակցությունն է՝ 1964 քվե՝ մոտ 15.9 տոկոս։

ՔՊ ցուցակը Իջևանում գլխավորում է համայնքապետի ժ/պ Արթուր Ճաղարյանը։

Ընտրություններին մասնակցել է ընտրողների 37.43 տոկոսը։

Նախօրեին ՏԻՄ ընտրություններ են եղել նաև Կոտայքի մարզի Արզնի և Լոռու մարզի Լերմոնտովո համայնքներում։ Ի տարբերություն նախորդ համայնքների՝ այստեղ ընտրությունները ոչ թե համամասնական, այլ մեծամասնական կարգով էին։ Արզնին ընտրում էր ավագանու անդամների, իսկ Լերմոնտովոն՝ ավագանու անդամների և գյուղապետի։