ԱԱԾ. մեղավորը հովվի հետևից Ադրբեջան գնացած հայ սահմանապահն է

Սահմանային Ներքին Խնձորեսկի միջադեպից 2 օր անց Ազգային անվտանգության ծառայությունը հայտարարել է՝ հայ զինծառայողներն են խախտել սահմանապահ ծառայության կանոնները:

Ամփոփելով ծառայողական քննության արդյունքներն՝ ԱԱԾ-ից այսօր պաշտոնական հաղորդագրություն է տարածել, թե սահմանապահ ծառայության պարտադիր ժամկետային զինծառայող, վերակարգի ավագ Յ․Ք․-ն և նրա համածառայակիցները փորձել են հատել Հայաստանի պետական սահմանը և վերադարձնել Ադրբեջանի տարածք անցած հովվին ու նրա հոտը՝ այդ կերպ խախտելով սահմանապահ ծառայություն կրելու կանոնները, ինչն անզգուշությամբ պատճառել է էական վնաս:

«Նշված սահմանապահ հատվածում սկսվել է անհարկի հրաձգություն, ակնհայտ վտանգի է ենթարկվել մարդկանց կյանքն ու առողջությունը, նկարագրված գործողություններն առաջացրել են պետության անվտանգության համար սպառնալիք, ինչպես նաև պետական սահմանի նշված հատվածում պատշաճ հսկողության բացակայության վիճակ», – ասված է հաղորդագրությունում:

Տեղի ունեցածի հետևանքով ադրբեջանցի սահմանապահ զինծառայող է վիրավորվել։ Հայաստանի ԱԱԾ-ն այդ առնչությամբ ափսոսանք է հայտնել և վստահեցրել, թե համապատասխան միջոցներ կձեռնարկվեն ծառայության կանոնները խստագույնս պահպանելու և այդպիսի դեպքերը բացառելու ուղղությամբ:

Ապրիլի 10-ին Ներքին Խնձորեսկի հատվածում հայ և ադրբեջանցի սահմանապահների միջև հրաձգությունը, ըստ հայկական կողմի, կենցաղային պատճառներով է սկսվել․ հովիվը մոլորված հոտին փնտրելիս հայտնվել է Ադրբեջանի տարածքում, իրադրության բերումով երկու կողմերի սահմանապահների կողմից հրաձգություն է տեղի ունեցել: Հայաստանի ազգային անվտանգության ծառայությունը նույն օրը հայտարարել է՝ պատրաստ է Ադրբեջանի սահմանապահ զորքերի հետ համատեղ քննություն իրականացնել։ Միջադեպից ժամեր անց տեղեկացրել են՝ ադրբեջանական կողմը վերադարձրել է և՛ հովիվին, և՛ մոլորված հոտը։

Սահմանամերձ Ներքին Խնձորեսկի բնակիչներից մեկն էլ պատմել է, թե մոլորված հովիվը Տեղ գյուղից էր․ «Նա շատ շներ ունի, շները հարձակվել են էդ պահին թուրքերի [ադրբեջանցիների – խմբ․] վրա, կրակոցներ են եղել»։

Քննչական կոմիտեից տեղեկացրել են, որ սահմանապահ ծառայության կանոնները խախտելու հոդվածով քրեական վարույթ են նախաձեռնել: Այս պահին գործով մեղադրյալ չկա: