Եվրաինտեգրման համար ցույցերը Վրաստանում ցրվում են բիրտ ուժով

Ցույցերը վերսկսվել են Թբիլիսիում այն բանից հետո, երբ վարչապետ Իրակլի Կոկախիձեն երեկ հայտարարել է, որ Վրաստանը կսառեցնի Եվրամիությանը միանալու պրոցեսը մինչև 2028-ի վերջ և կհրաժարվի եվրոպական դրամաշնորհներից։

Ուրբաթ երեկոյան հազարավոր ցուցարարները շրջապատել են Խորհրդարանի շենքը։ Ոստիկանությունը կոչ է արել բացել Ռուստավելի  պողոտայի երթևեկությունը, այնուհետև ուժով է ցրել ցույցը՝ կիրառելով ջրցան մեքենաներ,  ռետինե փամփուշտներ, արցունքաբեր գազ: Բախումներից տուժել են տասնյակ մարդիկ։ Շտապօգնությունը հիվանդանոց է տեղափոխել 33 վիրավորի, այդ թվում 16 ոստիկանների, 4 լրագրողների, 13 ցուցարարի։

Ըստ OC MEDIA լրատվական պլատֆորմի՝ ոստիկանները հայհոյել են ցուցարարներին, թիրախավորել այն լրագրողներին, ովքեր նկարահանում էին ոստիկանական բռնությունները։

Ցուցարարները վրաններ են դրել երթևեկելի մասում, բարիկադներ սարքել նստարաններով և աղբամաններով։ Այսօր դեպի ոստիկաններ ցուցարարները ևս «զենքեր» են կիրառում. ուսարձայներ, հրավառության խաղալիքներ։

Ցույցեր են նաև Բաթումիում, Զուգդիդիում, Փոթիում և այլ  վրացական քաղաքներում:

Ցուցարարներին ողջունել է նախագահ Սալոմե Զուրաբիշվիլին։ «Ակնհայտ է՝ ոչ ոք չի ուզում հաշտվել ռուսաստանացված Վրաստան, Սահմանադրությունից զրկված Վրաստան ունենալու մտքի հետ»,- հայտարարել է նա հեռուստատեսային  ուղերձով։

Վրաստանի ՆԳՆ հաղորդմամբ՝ գիշերվա ցույցերի ժամանակ բերման է ենթարկվել 107 անձ։