Արթուր Իսպիրյանը մասնակցել է քաղաքապետարանի միջոցառումներին, բայց նրանց աշխատանքից դժգոհ է
Երգիչ Արթուր Իսպիրյանը, թեև նկարահանվել է Երևանի տոնին նվիրված տեսահոլովակում և մասնակցել քաղաքապետարանի՝ տոնի առթիվ կազմակերպած համերգներին, սակայն դժգոհ է Երևանի քաղաքապետարանի աշխատանքից: Այս մասին Իսպիրյանն ասել է Epress.am-ի հետ զրույցում:
Երևանի ավագանու ընտրություններին մասնակցող «Բարև Երևան» դաշինքի ցուցակում ընգրկված Իսպիրյանը նշել է, որ եթե գոհ լիներ քաղաքապետարանի աշխատանքից, չէր ցանկանա ավագանու անդամ դառնալ, այլ իր երգով կշարունակեր զբաղվել:
Երգրիչն ասել է, որ շատ դժգոհ է քաղաքապետարանի վերջին 4 տարվա աշխատանքից և անձամբ փորձել է ինչ-որ բան փոխել՝ ահազանգելով քաղաքի տարբեր հատվածներում տեղի ունեցող վայրագությունների մասին, քաղաքապետարան ուղարկելով լուսանկարներ և դիմումներ:
«Հիմա էլ ես նկարել եմ Հաղթանակի կամուրջի մոտ տեղի ունեցող վանդալիզմը: Ինչ-որ ռեստորանի շինարարություն է գնում, հողը լվցում է երգեհոնաքարերի վրա, ծառերը կտրվել են»,- ասել է Իսպիրյանը:
Երգիչը պարզաբանել է, որ իր համար քաղաքի ընտրություններին մասնակցելու ամենամեծ խթանը եղել է այն, որ Փակ շուկան վերածվելու է սուպերմարկետի:
«Ես ապրում էի Փակ շուկայի կողքի շենքում, և դպրոց գնալուց անցնում էի շուկայով: Որովհետև այդտեղից գալիս էր ողջ Հայաստանի հոտը, համը: Իսկ հիմա մեր աչքի դեմը քանդում են իմ երազանքի քաղաքի շուկան»,- պատմել է Իսպիրյանը:
Ըստ նրա՝ ներկայիս ավագանու աշխատանի ամենամեծ թերությունն այն է, որ քաղաքապետարանին հատկացված պետական բյուջեն նպատակային չի ծախսվում:
«Դեկորատիվ բաների վրա են ծախսում, ծաղիկների և այլն, փողը ծախսվում է ցուցամոլության համար, ցույց տալու, թե իբր աշխատում են, սակայն ոչ մի բան չի փոխվում: Երևանը ունի վթարային շենքեր, խնդիրներ ջրամատակարարման հետ, անմխիթար անցումներ: Հյուսիսային պողոտայում անցումներ են իբր կառուցել, չես կարող ընտանիքով անցնել այդ անցումներով, որովհետև փող են հավաքում բնակիչներից, բայց չեմ մաքրում: Հյուսիսային պողոտայի համար ու առհասարկ Երևանը էս տեսքի բերելու համար Նարեկ Սարգսյանը վանդաիլզմի հոդվածով պետք է դատվի»,- ասել է Իսպիրյանը:
