Գլխավոր / Հայաստան / Ծառուկյանը ներքին կոնֆլիկտի լուծումը վստահեց եվրոպացի չինովնիկին

Ծառուկյանը ներքին կոնֆլիկտի լուծումը վստահեց եվրոպացի չինովնիկին

Այսօր Հայաստանի ձյուդոյի ֆեդերացիայի նախագահ Ալեքսան Ավետիսյանը հրաժարական տվեց իր պաշտոնից, Հայաստանի օլիմպիական կոմիտեի նախագահ Գագիկ Ծառուկյանի կողմից նշանակվեց ՀԱՕԿ փոխնախագահ:

Ձյուդոյի ֆեդերացիայի այսօրվա արտահերթ նիստին Գագիկ Ծառուկյանը նշեց, որ ձյուդոյի ֆեդերացիայում ստեղծված իրավիճակի հանգուցալուծումը վստահվում է Ձյուդոյի միջազգային ֆեդերացիայի նախագահ Մարիուս Վիզերին, ով երեկ ժամանել էր Երևան և ներկա էր նիստին:

Դիմելով նիստի մասնակիցներին` Մարիուս Վիզերը նշել է, որ երեկ հեռուստատեսությամբ, իսկ հետո նաև տեսահոլովակով նա ծանոթացել է Ալեքսան Ավետիսյանի գործունեության հետ կապված բողոքներին: Նա նշել է, որ բողոքներից շատերի ճշմարտացիությունը միայն արտարադատության ատյանները կարող են որոշել:

Ալեքսան Ավետիսյանն իր խոսքում նշեց, որ մինչ Գագիկ Ծառուկյանի և պարոն Վիզերի որոշումը ինքը վայր է դնում իր լիազորությունները որպես Հայաստանի ձյուդոյի ֆեդերացիայի նախագահ:

Դրանից հետո Գագիկ Ծառուկյանը հայտարարել էր, որ Ալեքսան Ավետիսյանն աշխատանքի կանցնի Հայաստանի օլիմպիական կոմիտեում և կզբաղեցնի փոխնախագահի պաշտոնը: ՀԱՕԿ-ի նախագահի խոսքով` դա տեղի է ունեցել Մարիուս Վիզերի խնդրանքով:

Գագիկ Ծառուկյանն առաջարկել է նիստի մասնակիցների ծափողջույններով շնորհակալություն հայտնել Մարիուս Վիզերին` Երևան ժամանելու և Հայաստանի ձյուդոյի ֆեդերացիայի հոգսերը հոգալու համար:

Նշենք, որ երեկ «Կենտրոն» հեռուստատեսությամբ մի քանի անգամ նույն տեսանյութն էր հեռարձակվում, որտեղ նշվում էր, որ Հայաստանի ձյուդոյի ֆեդերացիայի նախագահ Ալեքսան Ավետիսյանը բազմաթիվ խախտումներ է թույլ տվել: Տեսանյութում ներկայացվում էին օրեր առաջ ֆեդերացիայի նիստի ընթացքում Ավետիսյանի հասցեին հնչած մեղադրանքներն առ այն, որ ֆեդերացիայի նախագահը գումարներ է յուրացրել և ապօրինություններ է գործել:

Մինչ այդ Ալեքսան Ավետիսյանը մամուլում տված հարցազրույցում խոսել էր «Գագիկ Ծառուկյանի անօրինականությունների» մասին: Ավետիսյանը նշել էր, որ Ձյուդոյի միջազգային ֆեդերացիայի նախագահ Մարիուս Վիզերը տեղյակ է ստեղծված իրավիճակին և իր դժգոհությունն է հայտնել այդ կապակցությամբ:

Վիզերը հենց այդ կապակցությամբ էր ժամանել Երևան և, փաստորեն, կարողացել էր հարթել Ավետիսյանի և Ծառուկյանի միջև ծագած կոնֆլիկտը:

Tekali Taxi