Home / Հայաստան / Հայաստանում իշխանությունները դարձել են կրիմինալի պատանդը. Աբրահամյան

Հայաստանում իշխանությունները դարձել են կրիմինալի պատանդը. Աբրահամյան

Ընդհանրապես, բոլոր երկրներում էլ քաղաքական պայքարի ընթացքում երբեմն ոչ թույլատրելի կարգով այս կամ այն քաղաքական ուժը օգտագործում է նաև այդ կրիմինալի հնարավորությունները: «Ժամանակ» օրաթերթի հետ զրույցում, պատասխանելով կրիմինալի և իշխանությունների սերտաճման մասին հարցին, ասել է ՀՀ Ներքին գործերի նախկին նախարար, «Հանրապետություն» կուսակցության քաղխորհրդի անդամ Սուրեն Աբրահամյանը:

«Սակայն հետաքրքիրն այն է, որ յուրաքանչյուր իրեն հարգող քաղաքական ուժ, որի նպատակը երկրի զարգացումն ու օրինական երկիր ստեղծելն է, իշխանության գալուց հետո ինքն իր ձեռքով, կոպիտ ասած, չեզոքացնում է, խեղդում է այն կրիմինալին կամ այն ուժերին, որոնց ինքն օգտագործել է: Մուսոլինին, երբ Իտալիայում եկավ իշխանության, եկավ իտալական մաֆիայի օգնությամբ: Բայց դրանից հետո շնորհակալական կարգով մաֆիայի բոլոր պարագլուխներին հրավիրեց, եթե ճիշտ եմ հիշում, «Կարավելա» նավի վրա խրախճանքի, ինքը մի կես ժամ ուշացավ, նավը պայթեց, և կրիմինալն ու մաֆիան վերացան», – ասել է Աբրահամյանը:

Նա նշել է, որ այդ օրինակը, միգուցե, տիպական չէ մեր երկրի համար, յուրաքանչյուր քաղաքական ուժ իշխանության գալուց հետո վանում է կրիմինալին, նույնիսկ շատ խիստ պատժում է` մոռանալով նրա մատուցած ծառայությունները:

«Ցավոք սրտի, Հայաստանում իշխանությունները եկան այդ կրիմինալի օգնությամբ և հետո դարձան նրանց պատանդը: Այսինքն` կրիմինալը, մականունավորները ներխուժեցին իշխանական տարբեր օղակներ: Եվ դա, ցավոք սրտի, իշխանությունը պահելու ավելի հեշտ տարբերակ էր», – նշել է ՆԳ նախկին նախարարը:

Tekali Taxi