Home / Армения / Ժողովրդական հեռուստատեսության համար հայաստանցիներն արդեն 3,5 միլիոն են հավաքել

Ժողովրդական հեռուստատեսության համար հայաստանցիներն արդեն 3,5 միլիոն են հավաքել

Հայաստանի հեռուստալսարանն այդքան էլ գոհ չէ նրանից, թե ինչ են առաջարկում իրեն բազմաթիվ հեռուստաընկերությունները և կարելի է ասել, որ մեր հեռուստաեթերը շատ միակողմանի ճանապարհով է շարժվում ոչ միայն քաղաքական, այլ նաև զուտ բովանդակության առումով: Այս մասին այսօր լրագրողների հետ հանդիպմանը հայտարարել է «Ա1+»-ին սատարող Ժողովրդական հեռուստատեսության հիմնադրամի հոգաբարձուների խորհրդի անդամ Բորիս Նավասարդյանը` խոսելով Ժողովրդական հեռուստատեսություն ձևավորելու գաղափարի մասին:

«Նույնիսկ մենք ունենք այնպիսի խնդիր, որ հասարակությունը, միգուցե, այդքան էլ լավ չի պատկերացնում, թե ինչ է ինքը սպասում հեռուստատեսությունից: Միևնույն ժամանակ, մանավանդ Հայաստանի մարզերում հեռուստատեսությունը շատերի համար մնում է ոչ թե հիմնական, այլ տեղեկատվության միակ աղբուրը», – ասել է Նավասարդյան:

Նրա խոսքերով` այստեղից էլ ծնվեց Ժողովրդական հեռուստատեսություն ստեղծելու գաղափարը, որը կարող է նաև զբաղեցնել տվյալ դեպքում «Ա1+»-ի եթերի մի մասը:

Նշելով, որ բազմաթիվ երկրներում քաղաքացիները վճարում են հանրային հեռուստատեսություն ունենալու համար` Նավասարդյանն ընդգծել է.

«Եթե, իրոք, ժողովուրդն ու հասարակությունը ցանկանում է ունենալ այն, ինչ ինքն այսօր չունի, պետք է պատրաստ լինի ինչ-որ ձևով աջակցել այդ կարգի հեռուստատեսությանը»:

Առաջին փուլում Խորհրդի համար կարևոր էր հասկանալ, թե որքանով է հասարակության մեջ ընկալելի իր ուզած հաղորդումների համար վճարելու գաղափարը:

Մոտ 20 հազար քաղաքացիներ հայտնել են իրենց դրական կարծիքը` նույնիսկ խորհրդանշական գումար փոխանցելով: Նախնական տվյալներով` ստացված
գումարը կազմում է մոտ 3.5 միլիոն դրամ: Դրամահավաքն իրականացվելու է մինչև այս տարվա վերջը, ինչից հետո, ըստ «Ա1+» հեռուստաընկերության նախագահ Մեսրոպ Մովսիսյանի, հանրությանը կներկայացվի հստակ ծրագիր:

«Կհաղթի Ա1+, թե` ոչ, դա ազդեցություն չի ունենա գործընթացի վրա, որովհետև Ա1+ այսօր էլ եթերում է ինտերնետ-հեռարձակման մեջ: Սակայն ես համարում եմ, որ ժամանակից շուտ է հրաժարվել եթերից, հաճախությունից, և մեր պայքարը շարունակվում է: Ես լուրջ հույսեր ունեմ, որ հաղթելու ենք և այս պատվերն արդեն կլինի եթերում», – ասել է Մովսիսյանը:

Խորհրդի անդամ, «Ասպարեզ» ժուռնալիստների ակումբի նախագահ Լևոն Բարսեղյանի կարծիքով` ՀՌԱՀ-ի վրա մեծ ազդեցություն ունեցող ընդամենը մեկ մարմին կա` նախագահական պալատը. «Բաղրամյան 26-ում ինչպես գտան, այնպես էլ հանձնաժողովը կառաջնորդվի»:

Այնուամենայնիվ, Բարսեղյանը հավատում է, որ որոշում կայացնողները հաճախականությունը կտրամարդրեն այն հեռուստաալիքին, որը հնարավորություն ունի «այդ ալիքը դարձնել իսկապես ժողովրդական»:

Tekali Taxi