Գլխավոր / Հայաստան / Ոստիկանները խոշտանգել են անչափահաս մեղադրյալին. Հելսինկյան ասոցիացիա (Տեսանյութ)

Ոստիկանները խոշտանգել են անչափահաս մեղադրյալին. Հելսինկյան ասոցիացիա (Տեսանյութ)

Հելսինկյան Ասոցիացիան այսօր տարածած հաղորդագրության մեջ նշում է, որ Հայաստանի քաղաքացի, անչափահաս Արմեն Մարտիրոսյանին, ում մեղադրում են Կարեն Կարապետյանի և Պետրոս Հակոբյանի հետ 2009 թվականին կատարած մի շարք ավազակային հարձակումների մեջ, խոշտանգման է ենթարկվել ոստիկանների կողմից:

Արմեն Մարտիրոսյանը ձերբակալել են 2010 հունվարի 19-ին:

Նրա մայրը` Օֆելյա Մարտիրոսյանը, դիմել է Հելսինկյան ասոցիացիա և հայտնել է իր որդու նկատմամբ կատարված խոշտանգումների մասին: Նա հայտնել է, որ իր որդու ցուցմունքները կորզվել են խոշտանգումների միջոցով: Մոր խոսքերով՝ ոստիկանները գիշերը ժամը մեկից հետո, քաղաքացիական հագուստով, մոտ 10-15 հոգով առանց դուռը ծեծելու և ներկայանալու մտել են իրենց տուն և սկսել խուզարկել բնակարանը: Արմեն Մարտիրոսյանին ձերբակալել են այն ժամանակ, երբ նա գտնվում էր Գյումրիում և, համաձայն մոր խոսքերի, ամբողջ ճանապարհը՝ Գյումրիից Երևանի Արաբկիր համայնքի ոստիկանական բաժանմունք, նրան ենթարկել են ծեծի և խոշտանգումների: Դրանից 2-3 օր հետո Արմեն Մարտիրոսյանին տեղափոխել են մանկական գաղութ, որտեղ և մայրը տեսել է իր որդու մարմնի վրա առկա կապտուկները: Մայրը հայտնել է, որ որդու երիկամները մոտ երկու ամիս արունահոսում էին:

Հելսինկյան ասոցիացիայի փոխանցմամբ, Արմեն Մարտիրոսյանը հայտնել է, որ խոշտանգումների ժամանակ նա շատ է վատացել և նրան տարել են պատուհանի մոտ ու ասել, որ իրեն պատուհանից դուրս կնետեն: Խոշտանգումներից փրկվելու համար Արմեն Մարտիրոսյանը գաղութում ինքնասպանության փորձ է կատարել՝ կտրելով երակները:

Հելսինկյան ասոցիացիան հայտնում է, որ տեղեկություններ ունի նաև մյուս մեղադրյալների նկատմամբ կատարված խոշտանգումների մասին, սակայն ստույգ տվյալներ դեռևս չի կարողացել ներկայացնել:

Արմեն Մարտիրոսյանի գործով դատավարությունը սկսվել է 2010թ. օգոստոսին: Դատավարությունը ընթացքի մեջ է: Հաջորդ դատական նիստը նշանակված է 2011թ. օգոստոսի 29-ին, ժամը՝ 15:00-ին, Արաբկիր վարչական շրջանի ընդհանուր իրավասության դատարանում:

Tekali Taxi