Home / Հայաստան / «Թշնամին ազգի մեջ ա». բողոքող ազատամարտիկներն ուզում են եվրոպացիների կեսի կեսը ստանալ

«Թշնամին ազգի մեջ ա». բողոքող ազատամարտիկներն ուզում են եվրոպացիների կեսի կեսը ստանալ

Այսօրվանից Ազատության հրապարակում եռօրյա նստացույց անցկացնող ազատամարտիկները ՀՀ իշխանություններից պահանջում են իրենց իրավիճակի կտրուկ բարելավում, մասնավորապես, թոշակների բարձրացում, անվճար բուժօգնություն:

Մոտ երեք տասնյակ ազատամարտիկներ վերջին մեկ ամսում արդեն երկրորդ նստացույցն են անցկացնում: Այս անգամ նրանք պատրաստվում են Ազատության հրապարակում մնալ մինչև հինգշաբթի:

Ազատամարտիկ, պահեստազորի գնդապետ Վոլոդյա Ավետիսյանը նշել է, որ անցյալ շաբաթ ՊՆ նախարար Սեյրան Օհանյանի հետ կայացած հանդիպման ժամանակ վերջինս շահագրգռված է եղել իրենց օգնելու մեջ: Չնայած դրան, ազատամարտիկները կրկին որոշել են հավաքվել՝ հինգշաբթի օրը կայանալիք ՀՀ կառավարության նիստից առաջ իրենց ձայնը լսելի դարձնելու համար:

Epress.am-ի թղթակցի հետ զրույցում ազատամարտիկ, Էրեբունու շրջանի ջոկատի հրամանատար Ռուբիկ Իսրաելյանն առաջարկել է ՀՀ իշխանություններին «Եվրոխորհուրդ մտնելուց առաջ համեմատել եվրոպացին իր ազատամարտիկներին, զինվորներին ու նրանց ընտանիքներին ինչ ձևով է պահում և իրենք ինչպես են պահում ազատմարտիկներին Հայաստանում»:

«Թող նայեն ու մեզ դրա կեսի, կեսի չափ պահեն, մենք գոհ կմնանք», – ասել է ազատամարտիկը:

Ակցիայի մեկ այլ մասնակից ազատամարտիկ, 2-րդ կարգի հաշմանդամ, 45-ամյա Մխիթար Ասատրյանի խոսքով՝ Հայաստանում տիրող իրավիճակի բացատրությունը երկրում տիրող անարխիան է:

«Ոչ մի կառույցում նորմալ, համապատասխան մարդիկ չեն աշխատում, ամեն մեկը աշխատում է ուրագի պես: Էս մարդիկ, ովքեր եկել են էս ազգին կառավարելու, չեն կառավարում, այլ տանում են դեպի կործանում ու էս ազգն արդեն կործանման եզրի ա՝ նման կառավարության երեսից: Եթե ընդհանուր վերցնում ես՝ դիրքերում ավելի նորմալ է վիճակը, երբ զինվորը կանգնած է ակնհայտ թշնամու առաջ ու պահում է թշնամուն, այնինչ մեր թշնամին մեր թիկունքում ա, մեր ազգի մեջ ա ու մեզ ուտում ա: Մարդիկ արդեն կասկածում են՝ էդ մարդիկ դրածո ադրբեջանցի՞ են, թե հայեր են, որովհետև դրանց ոչ մի արածը հայի չէ», – ասել է ազատամարտիկը:

Նա նաև մտահոգություն է հայտնել, թե Ադրբեջանի կառավարությունը իր սրիկա մարդասպանին դարձնում է ազգային հերոս, իսկ Հայաստանի իշխանությունները իրենց ազատամարտիկներին դարձնում են բոմժեր ու ստիպում են արտագաղթել:

Tekali Taxi