Home / Հայաստան / Ով է հովանավորել ազատված դպրոցի տնօրենին․ Բախշյանի նամակը քաղաքապետին

Ով է հովանավորել ազատված դպրոցի տնօրենին․ Բախշյանի նամակը քաղաքապետին

Երևանի ավագանու «Բարև Երևան» խմբակցության ղեկավար Անահիտ Բախշյանը պնդում է, որ աշխատանքից ազատված մայրաքաղաքի թիվ 70 դպրոցի տնօրենն անօրինական ֆինանսական գործարքներ է իրականացրել։

Բախշյանը տնօրենի ազատման առիթով նամակ է հղել Երևանի քաղաքապետ Տարոն Մարգարյանին․

«Ապրիլի 22-ին իր դիմումի համաձայն աշխատանքից ազատվել է Երևանի թ.70 հիմնական դպրոցի տնօրեն Հեղինե Շափաղաթյանը, ով 2011թ. նոյեմբերին որպես տնօրեն աշխատանքային պայմանագիր է կնքել Ձեզ հետ ու անցած 2,5 տարիների ընթացքում հասցրել է թ.70 ՊՈԱԿ-ի կնիքով իրականացնել տարբեր անօրինական ֆինանսական գործարքներ, որոնք հակացուցված են ուսումնական հաստատության տնօրենի համար:

Տնօրենի անօրինական գործողությունները ոչ միայն չեն բացահայտվել Երևանի քաղաքապետարանի հանրակրթության և ֆինանսական վարչությունների կողմից, այլև ԶԼՄ-ների հրապարակումներից, դատարանի վճռից և իմ կողմից հանցագործության մասին հաղորդումից հետո, երբ մինչև վերջ բացահայտվեց արկածախնդիր, կրթօջախի տնօրենին հակացուցված կերպարը, նրան առնվազն աշխատանքից ազատելու փոխարեն տվեցին սուս-փուս դիմում գրելու ու գնալու հնարավորություն:

Չեմ կարող զուգահեռ չանցկացնել Երևանի թ.17 դպրոցի տնօրենին աշխատանքից ազատելու և այս տնօրենին իր դիմումի համաձայն ազատելու դեպքերի միջև: Առաջինի դեպքում տնօրենը, ըստ Ձեր հայտարարության, հարվածել էր մի աշակերտի, որն, իհարկե, երբեք խրախուսելի չէ, պարզվեց՝ Մհեր Սեդրակյանի հովանավորյալն էր, երկրորդն էլ ոտնձգություններ է կատարել պետական բյուջեի նկատմամբ, սակայն Ձեր կողմից թույլ տրվեց իր դիմումի համաձայն ազատվել, որովհետև, թույլ տվեք եզրակացնել, որ այս դեպքում էլ տնօրենն էր հովանավորված նույն Մհեր Սեդրակյանի կամ չգիտեմ ում կողմից:

Հասարակությունն այս ամենը տեսնում և հասկանում է, ինչպես նաև պահանջում է, որ բոլոր պետական պաշտոնյաները օրենքին և օրինականությանը հետևելու օրինակ ծառայեն, իսկ այս դեպքը ճիշտ հակառակի մասին է վկայում»: