«Բոքսերում ծեծում էին դուբինկաներով»․ ցմահ դատապարտյալը նամակ է գրել․ hetq.am

«Նուբարաշեն» ՔԿՀ դատապարտյալ Հարություն Խաչատրյանը, ով 2004 թվականին դատապարտվել է ցմահ ազատազրկման, hetq.am-ին ուղղված նամակում պնդում է, որ ծեծի և կտտանքների է ենթարկվել ու անհիմն դատապարտվել է դատախազ Կորյուն Փիլոյանի պատճառով։

Hetq.am-ը դատապարտյալի նամակը ներկայացնում է հատվածաբար.

«Ինձ 2004 թվականին անհիմն մեղադրել են սպանությունների մեջ՝ շառ ու շանտաժով: Ինձ դաժան ծեծի ենթարկելով սարքել են հաշմանդամ, ստիպում էին, որ գրեմ՝ իբր ես ներկա եմ եղել, եթե չէ, ինձ կմեղադրեն սպանությունների մեջ: Ես ինձ մեղավոր չեմ ճանաչել ոչ մի հոդվածով: Ինձ տարան ք.Մասիսի առաջին ատյանի դատարան առանց մեղադրականը տալու, որ գոնե ծանոթանամ, թե ինչում են ինձ մեղադրում: Հացադուլ արեցի, կարեցի աչքերս և բերանս, 5 օր ինձ պահեցին կարցերում: Ինձ, դուբինկաներով ծեծելով, էլեկտրաշոկի տալով քարշ տալով մայկայով, ոտաբոբիկ տարան դատարան, գցեցին ՑՄԱՀ՝ առանց վերջին խոսքի իրավունքի: Չէի կարող խոսել ու իրավունք չունեին դատեին, քանի որ հացադուլի մեջ էի: Այդ ամենը արեցին բռնի ուժով ու խուլիգանավարի… Դա անում էր դատախազ Փիլոյանի «բանդան»: Ինձ ճնշում էին, որ Վերաքննիչ ու Վճռաբեկ չդիմեմ, դիմումս հետ վերցնեմ: Երբ հացադուլ էի անում, ինձ բոքսերում ծեծում էին քացիներով, բռունցքներով, դուբինկաներով, ճղեցին շորերս, թափվեցին ատամներս: Էս ամենի մասին գրել եմ գլխավոր դատախազ Աղվան Հովսեփյանին, էն ժամանակվա արդարադատության նախարարին, վարչապետին, բայց մինչ օրս պատասխան չեմ ստացել: Կասկածում եմ, որ դիմումներս տեղ չեն հասել: Դատախազ Փիլոյանն եկավ իմ մոտ, երբ հացադուլի մեջ էի, դիմումներս նրա մոտ էին: Ասեց. «Ինչ էլ գրում ես, ինձ ա գալիս: Էլ մի գրի, թե չէ, կմտնեն մեկուսարան, քեզ կտանեն, կկորես, կեթաս: Կտանեն պադվալում ոտերիցդ կկախեն, էնքան կտան թոքերիդ, կտրաքացնեն: Կամ կսրսկեն, կամ ճաշիդ մեջ դեղ կլցնեն, տարբեր հիվանդություններ կբռնես, կմեռնես: Քանի ես սաղ եմ, քո գործը հետ քննության չի ուղարկվի: Հանգիստ նստի մի 20 տարի»:

Պատասխանեցի՝ խի՞, ո՞ւմ տեղը նստեմ, բեր մարդասպանին, թող նստի: Ասեց՝ նա 50.000 դոլար փող ա տվել, դու ի՞նչ ունես, որ տաս… Ինձ արհեստական սարքել են մարդասպան: Ես չգիտեմ, թե 2004 թ.-ից ում տեղն եմ նստած բանտում: Խնդրում ու պահանջում եմ, որ իմ գործով նորից քննություն լինի»:

Ամբողջությամբ՝ սկզբնաղբյուր կայքում