Epress.am Լուրեր Հայաստանից
Այսօր «Դուրս մեր գրպանից» նախաձեռնության կազմակերպած անհնազանդության ավտոերթը չի կայացել, քանի որ ոստիկանությունը փակել է Պռոշյան փողոցը և մասնակիցներին թույլ չի տվել մեքենաներով շարժվել դեպի Ազգային ժողով:
Անհնազանդության ավտոերթի մասնակիցները ստիպված են եղել կայանել մեքենաները և ոտքով գնալ ԱԺ-ի մոտ: Հայաստանի հանրապետության դրոշներով և «դուրս մեր գրպանից» գրությամբ պաստառներով՝ նրանք բողոքի ակցիա անցկացրեցին ԱԺ-ի դիմաց: Ակցիայի մասնակից Վարդան Հակոբյանն ընթերցել է իրենց պահանջը, այն է՝ համաներում վարչական իրավախախտումների մասով:
«Ինչո՞ւ եք թաքնվում ոստիկանների հետևում: Ինչո՞ւ եք արհեստական լարում ստեղծում ժողովրդի և ոստիկանների միջև: Դուրս եկեք կամ մեզ ներս հրավիրեք զրուցենք, մեր հարցերի պատասխանը ստանանք: Հասկանանք՝ ով եք դուք, ով է ձեզ այդտեղ դրել»,- ասել է երթի մասնակիցներից մեկը:
Հիշեցնենք, որ նախաձեռնությունը պահանջում է վերացնել կարմիր գծերը, 5 անգամ կրճատել տեսախցիկների և արագաչափերի տուգանքները, մինչ այժմ գրանցված տուգանքների վրա եկած տույժերի նկատմամբ հայտարարել համաներում, դադարեցնել բոլոր տեսակի տուգանքները մինչև նոր կանոնակարգի հաստատումը: