ԵՏՄ֊մտնելուց հետո էլ Հայաստանում շարունակվելու են ժողովրդավարական բարեփոխումները․ Սերժ Սարգսյան

Հայաստանի՝ Եվրասիական տնտեսական միությանը միանալու պայմանագրի ստորագրումը նոր զարկ կտա Հայաստանի տնտեսությանը։ Այս մասին Սերբիայի նախագահ Տոմիսլավ Նիկոլիչի հետ հանդիպումից հետո ասել է ՀՀ նախագահ Սերժ Սարգսյանը։

«Եվրասիական տարածքում ապրանքների, ծառայությունների, կապիտալի և աշխատուժի ազատ տեղաշարժով և մատչելի էներգակիրների հասանելիությամբ ու միասնական տրանսպորտային լուծումների ներդրմամբ պայմանավորված մեր տնտեսության մրցունակության և արդյունավետության բարձրացման նոր հնարավորություններ են առաջ գալիս:

Բայց կարևոր է, որ մեր գործընկերներն իմանան՝ մենք դա երբեք չենք հակադրում Եվրոպական միության հետ մեր ունեցած երկխոսությանը: Այն շարունակվում է և շարունակվելու է, քանի որ մենք ունենք բազմաթիվ համընկնող շահեր, մենք ունենք ընդհանուր ժառանգություն, որի վրա հենվելով՝ շարունակում ենք մեր երկրում ժողովրդավարական բարեփոխումների գործընթացը», ֊ ասել է Սերժ Սարգսյանը:

Հիշեցնենք, որ Սարգսյանը Հայաստանի՝ ՌԴ֊ի կողմից նախաձեռնած ԵՏՄ֊ին միանալու ցանկության մասին հայտնել է 2013 սեպտեմբերի 3-ին Մոսկվայում ՌԴ նախագահ Վլադիմիր Պուտինի հետ կայացած հանդիպումից հետո։ Մինչ դա, Հայաստանը 3 տարուց ավելի նախապատրաստվում էր ԵՄ֊ի հետ Ասոցացման պայմանգիրը ստորագրելու համար։