Home / Հայաստան / Ոսկու շուկայի աշխատակիցները դժգոհ են իրենց պարտադրվող նոր վճարի չափից․ «Հրապարակ»

Ոսկու շուկայի աշխատակիցները դժգոհ են իրենց պարտադրվող նոր վճարի չափից․ «Հրապարակ»

Երևանի Ոսկու շուկայի աշխատակիցները նոր բողոքի ալիք են բարձրացրել, նրանցից շատերն սպառնում են, որ հուլիսի 1-ին կհանձնեն իրենց սեղանիկները և ընտանիքներով կարտագաղթեն Հայաստանից։ Այս մասին իր այսօրվա համարում գրում է «Հրապարակ» օրաթերթը։

Նրանք, ըստ հոդվածագիր Աննա Մաթևոսյանի, դժգոհ են ՀՀ կառավարության կողմից հավանության արժանացած ««Արտոնագրային վճարների մասին» օրենքում լրացումներ կատարելու մասին» օրենքի նախագծից, որով առաջարկվում է Երևանում գործող ոսկու շուկաներում կիրառվող շրջանառության հարկը փոխարինել արտոնագրային վճարով։ Որպես արտոնագրային վճարի չափ՝ մայրաքաղաքի շուկաների համար սահմանվել է առավելագույնը 35 հազար դրամ, մարզկենտրոնների համար՝ 25 հազար, սահմանամերձ համայնքներում՝ 0 դրամ։ Շրջելով ոսկու շուկայի (բաղնիքի ոսկու շուկայի) տաղավարներով՝ Մաթևոսյանը զրուցել է վաճառողների հետ։

«Մենք բազմիցս մեր բողոքներում ասել ենք, որ ավելի լավ է կոնկրետ գումար սահմանեք ոսկի վաճառողների համար և վերջ։ Այսօր կառավարությունն արդեն այդ վորոշումը կայացրել է և խելքից հեռու մի գումարի չափ սահմանել՝ 35 հազար դրամ։ Այ մարդ, որ էդ գումարը սահմանում եք, մի հատ չե՞ք ասում՝ խեղճ ոսկու վաճառողը կարա՞ էդքան մուծի», – ասել է Ոսկու շուկայի աշխատակից Կարինե Նազարյանը։

«Հրապարակ»-ը մեջբերում է աշխատակիցների խոսքերն այն մասին, որ պետք է յուրաքանչյուրի համար առանձին գումար սահմանվեր, և գումարի չափը կախված լիներ տարածքի մեծությունից, գտնվելու վայրից․ «Ես շուկայի ծայրում եմ, իսկ մեկը՝ սկզբում, ու ինքը թափով գործ ա անում, պարզ չի՞, որ ինքը հեշտ ու հանգիստ կվճարի, էդ դեպքում ես ինչի՞ պետք ա նույնքան վճարեմ, որքան կենտրոնում դրած սեղանիկի տերը»։

Ոսկու առևտրով զբաղվողները գրավոր նամակով դիմել են ՀՀ կառավարություն, ներկայացնելով իրենց դժգոհություններն ու առաջարկությունները՝ օրենքի հետ կապված, և սպասում են, որ համաձայնության կգան․ «Ախպերական պետք ա գումարի չափը կիսենք, հակառակը չի կարող լինել»։

Tekali Taxi