Home / Բանտ / «Ի՞նչ են ուզում իմ ընտանիքից». «Հաց բերողի» եղբայրն անհետացել է․ hetq.am

«Ի՞նչ են ուզում իմ ընտանիքից». «Հաց բերողի» եղբայրն անհետացել է․ hetq.am

«Սասնա ծռեր» խմբի աջակից, որպես «հաց բերող» հայտնի Արթուր Սարգսյանի եղբայրը՝ Արսեն Սարգսյանն անհետացել է: Արթուր Սարգսյանի մայրը՝ տիկին Դոնարան, Hetq.am֊ի հետ զրույցում ահազանգել է, որ փետրվարի 11-ին՝ երեկոյան, որդին դուրս է եկել տանից և մինչ օրս չի վերադարձել: Մայրը մտավախություն ունի, որ նրան ևս կարող է ձերբակալած լինեն:

Նշենք, որ Արթուր Սարգսյանը, որը բանտից ազատ էր արձակվել դեկտեմբերի 31-ին, փետրվարի 9-ին կրկին կալանավորվել է։

Տիկին Դոնարան պատմել է Hetq.am֊ին, որ Արթուրի ձերբակալման օրը բոլորով եկել են Երևան, բայց փետրվարի 11-ին Արսենը գնացել է Արարատի մարզի Բյուրավան գյուղի իրենց տուն, որպեսզի ինչ-որ իրեր բերի: Մոտենալիս հեռվից նկատել է, որ տան դարպասները բաց են, և կարմիր բերետավորներ, համազգեստով և ոչ համազգեստով անձինք իրենց տան շուրջն են պտտվում, մի քանի մեքենա է կանգնած դարպասների մոտ: Արսենը հեռվից հետևել է՝ վախենալով տուն մտնել և հետ է վերադարձել Երևան: Այդ ամենի մասին պատմել է տիկին Դոնարային, նրան է հանձնել հեռախոսը և ասել, որ գնում է:

Այդ օրվանից մայրը որդուց լուր չունի: Կասկածում է, որ տղային ևս հետևել են, ձերբակալել են կամ էլ թաքնվել է՝ վախենալով հետապնդումից:

«Մենք այս պետությանը թշնամի չենք, ապրել ենք մարդավարի, մարդկանց օգնող, հասնող, իսկ հիմա ստացվում է այնպես, որ իմ մի որդին բանտում է՝ հացադուլի մեջ, իսկ մյուս տղաս էլ՝ չգիտեմ, թե որտեղ է: Թող իմ Արսենին բերեն հետ, ինչու պիտի վախեցած լիներ, ուրեմն մի բան տեսել կամ զգացել է»,- ասել է նա:

Կայքը հիշեցնում է, որ Արթուր Սարգսյանի ձերբակալման օրը ՀՔԾ-ի շենքի մոտ Արսենը նշել էր, որ վախեցած և տագնապած է, և գուցե եղբոր ձերբակալությունից հետո հերթն իրենն է:

«Անհանգիստ եմ, չեմ քնում, փողոցներն եմ թափառում, ինչքան ծանոթ մարդ կա՝ հարցնում եմ, ոչ մեկ Արսենիս չի տեսել: Ի՞նչ են ուզում իմ ընտանիքից: Ես վախենում եմ, եթե եկել են տուն, հնարավոր է՝ մի բան տեղադրած լինեն՝ զենք կամ թմրանյութ, որպեսզի Արսենին տանելու հիմք ունենան: Սա իմ ընտանիքի հանդեպ հետապնդում է»,- ասել է Սարգսյան եղբայրների մայրը:

Արթուր Սարգսյանը 2016-ի հուլիսի 26-ին ճեղքել է ոստիկանական պատնեշը և սննունդ հասցրել Էրեբունի համայնքի ՊՊԾ գնդում գտնվող «Սասնա ծռեր» խմբի անդամներին և բժիշկներին. ըստ մեղադրանքի, նա «օժանդակել է բժիշկներին պատանդ պահելուն, ապօրինի զենք-զինամթերք է փոխադրել և կրել»։

Tekali Taxi