Epress.am Լուրեր Հայաստանից
Արմավիրի մարզում 1-ամյա Արման Գրիգորյանի սպանության հետ կապված Քննչական կոմիտեն հաղորդագրություն է տարածել, որ նախնական տվյալներով՝ հանդամասում գտնվող իրենց բնակության վայրում հայրը՝ Ռուստամ Մանուկյանը, ծեծել է որդուն, որը ստացած մարմնական վնասվածքներից տեղում մահացել է: Բացի այդ, ըստ երեխայի մոր՝ Օվսաննա Գրիգորյանի հայտարարության, նույն օրը ամուսինը բռնություն է գործադրել նաև իր նկատմամբ։
«Երեխայի մոր մասնակցությամբ կատարվել է դեպքի վայրի զննություն, որի ժամանակ պարզվել է, որ փոքրիկի դին նախ փորձել են թաքցնել փոսի մեջ՝ սպանությունը քողարկելու համար, բայց երեխայի մայրը, վերցնելով նրան, դիմել է փախուստի և տեղափոխել բժշկական կենտրոն, որտեղ բժիշկներն արձանագրել են մահը», -նշված է ՔԿ-ի հայտարարության մեջ։
Հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին (սպանություն) և 118-րդ հոդվածի 1-ին (ծեծ) մասերով։
Ռուստամ Մանուկյանը ձերբակալվել է։