Epress.am Լուրեր Հայաստանից
Մեկ տարի շարունակ շվեդ դպրոցական Գրետա Թյունբերգը «Դասադուլ հանուն կլիմայի» պաստառով ամեն ուրբաթ օր նստել է շվեդական պառլամենտի առաջ` առաջ բերելով համաշխարհային #FridayForFuture շարժումը։ Սա այն է, ինչ կարելի է իմանալ շվեդական կրթական սիստեմի մասին։ Բնապահպանական համաշխարհային մոբիլիզացիայի օրը Հայաստանի մարզերից մեկում, որտեղ մետաղական հանքի ապագան է սպառնում մարդկանց, դպրոցականները մասնակցել են մեկօրյա դասադուլի։ Իրար հետևից հրապարակվում են համապատասխան նախարարության դատապարտող հայտարարությունը և տնօրենի սպառնալիքից լաց լինող երեխայի տեսահոլովակը։
Սա էլ այն է, ինչ պետք է իմանալ հայկական կրթական սիստեմի մասին։ Արդեն քանի տասնամյակ երեխան լաց է լինում, իսկ տնօրենը ժանդարմ է։ Եւս քանի՞ տասնամյակ է պետք, որ սա փոխվի վերջապես։ Թե՞ երեխաները Թավշյա հեղափոխության միսն էին, որ Սերժին պետք է մերժեին, իսկ Ամուլսարի հանքը` ոչ։ Աշխարհում լավագույնն են համարվում առաջադիմական կրթական մոդելները։ Ի՞նչ մոդել է առաջարկում Հայաստանը սրա կողքին։ Կյանքի մարտահրավերներին անպատրաստ երեխա, որի գլխին բամփում են, շարադրությունները գրում, խնդիրները լուծում։ Երեխա իշխանության համար, հայրենիքի համար, ապագայում մեռնելու և ծնելու համար։ Ուղղակի մսացու։ Հազար անգամ ասել ենք` մեզ պապա պետք չի, մեր գլխին կեղծ պապայություն մի արեք։ Եթե Թավշյա հեղափոխությունը անգամ լացն ու սպառնալիքը չի վերացրել, բռնությունը չի վերացրել դպրոցից, ուրեմն երեխաների տեղը փողոցում է, և նրանք որբ են, թողեք իրենց որբությունը հանգիստ ապրեն։
Գայանե Այվազյան
աղբյուր՝ ֆեյսբուքի էջ