Հայաստանում գրանցվել է կորոնավիրուսով վարակման առաջին դեպքը

Փետրցարի 28-ին Իրանից Հայաստան ժամանած տղամարդու մոտ հաստատվել է նոր կորոնավիրուսի առկայությունը։ Այս մասին ֆեյսբուքյան գրառմամբ հայտնել են վարչապետ Նիկոլ Փաշինյանը և Առողջապահության նախարար Արսեն Թորոսյանը։

29-ամյա տղամարդու մոտ կորոնավիրուսով հիվանդացությունը կրկնակի քննությամբ հաստատվել է այսօր՝ Երևանի ժամանակով գիշերվա երեքին։ Պացիենտի վիճակը, Նիկոլ Փաշինյանի հաղորդմամբ, լավ է․ հիվանդանոց դիմելու պահին նա ջերմություն է ունեցել, այժմ ջերմություն չունի․

«Հատկանշական է, որ կորոնավիրուսով վարակված ՀՀ քաղաքացու կնոջ մոտ այս պահին վարակ չի հայտնաբերվել։

Իհարկե, այստեղ կարող է դեր ունենալ ինկուբացիոն շրջանը, այսինքն՝ տեսականորեն հնարավոր է, որ վիրուսը դեռևս չի դրսևորել իրեն։ Բայց կա նաև հավանականություն, որ վիրուսակիր անձի հետ շփում ունեցող մարդիկ չվարակվեն, որովհետև վարակի տարածման համար բավարար չէ, որ մարդու օրգանիզմում վիրուսը ներկա լինի։

Վարակը փոխանցվում է այն ժամանակ, երբ վիրուսը մարդու օրգանիզմում մեծ քանակով վերարտադրվում է, շատանում, ապա և փոխանցվում փռշտոցի, կամ հազի, կամ օդակաթիլային այլ եղանակով։ Ըստ մասնագետների, ահա, քանի դեռ վարակը մարդու մոտ չի արտահայտվել՝ տենդի, հազի, փռշտոցի միջոցով, հավանականությունը, որ նա վարակած կլինի այլ մարդկանց, շատ փոքր է», – ֆեյսբուքի իր էջում գրել է Փաշինյանը։

Թեհրանից ժամանած օդանավի մեջ բացառապես Հայաստանի քաղաքացիներ են եղել։ Ըստ Փաշինյանի՝ օդանավակայանում և օդանավի մեջ բոլորը կրել են դիմակներ, ոչ անհրաժեշտ շփումներից խուսափելու համար օդանավից ուղեկցվել են հատուկ կարգով․ «Հայտնի է սահմանապահ ծառայության այն աշխատակիցը, որը ձևակերպել է պացիենտի և նրա կնոջ մուտքը ՀՀ։ Սահմանապահները նույնպես եղել են դիմակներով և բժշկական ձեռնոցներով։