Կալանավորին ծեծի են ենթարկել արտերկրում բնակվող քրեական հեղինակության պատվերով

«Նուբարաշեն» քրեակատարողական հիմնարկի կալանավորված անձին ծեծի են ենթարկել արտերկրում բնակվող քրեական հեղինակության պատվերով, հայտնում են ԱՆ քրեակատարողական ծառայության հանրային կապերի բաժնից։

2020 թվականի փետրվարի 25-ին «Նուբարաշեն» ՔԿՀ-ում կալանավորված, քրեական աստիճանակարգության մեջ որոշակի դիրք զբաղեցնող Վ.Ա-ն գլխի ձախակողմյան հատվածում վնասվածքով, ցավերով և մի շարք այլ գանգատներով տեղափոխվել է բժշկական հաստատություն։ ՔԿԾ-ի հաղորդմամբ, նա հայտարարել է, թե դրանք առաջացել են փետրվարի լույս 25-ի գիշերը՝ իր խցի սանհանգույցից դուրս գալու ընթացքում անզգուշությամբ սայթաքելու և վայր ընկնելու հետեւանքով:

Նշանակվել է դատաբժշկական փորձաքննություն։ ՔԿԾ օպերատիվ բաժնում «ձեռնարկված միջոցառումների» արդյունքում տեղեկություններ են ստացվել, որ Վ․Ա․-ին ծեծել են նույն ՔԿՀ֊ում պահվող դատապարտյալները՝ պատվերով։

«Կալանավորված անձը մարմնական վնասվածքներն իրականում ստացել է մեկ այլ խցում քրեական աստիճանակարգության մեջ դարձյալ որոշակի դիրք զբաղեցնող ուրիշ դատապարտյալների կողմից ծեծի ենթարկվելու հետեւանքով: Ծեծն ուղղորդված և կազմակերպված է եղել արտերկրում բնակվող քրեական աստիճանակարգության բարձրագույն կարգավիճակ ունեցող, ազգությամբ հայ անձանցից մեկի կողմից», – նշում է Քրեակատարողական ծառայության հանրային կապերի բաժնից։։

Քննության առարկա է դարձել նաև քրեակատարողական հիմնարկի պաշտոնատար անձանց կողմից առերևույթ պաշտոնեական հանցագործություններ կատարելու հանգամանքը, նախապատրաստվող նյութերն ուղարկվել են Գլխավոր դատախազություն` հետագա ընթացքը լուծելու համար։

Վ.Ա-ի նկատմամբ բռնություն գործադրած դատապարտյալները տեղաբաշխվել են այլ քրեակատարողական հիմնարկ, որտեղ նրանց նկատմամբ իրականացվում է ուժեղացված հսկողություն։