Home / Շուկա / «Վիրուսոտներ»․ մեկուսացված մարտունեցիների տան վրա «լակոտություն» են արել

«Վիրուսոտներ»․ մեկուսացված մարտունեցիների տան վրա «լակոտություն» են արել

Գեղարքունիքի մարզի Մարտունի համայնքում անհայտ մարդիկ «հարձակվել են» կորոնավիրուսով վարակված քաղաքացիների առանձնատան վրա, շրջել դարպասի մի հատվածը, պատերին գրել՝ «վարակակիրներ», «կոորոնավիրուս», «վիրուսոտներ» և այլ բառեր։

Այս մասին գրել է Panorama.am-ը։ Աղբյուրի համաձայն, Մարտունու համայնքապետ Արմեն Ավետիսյանն այս արարքն անվանել է «լակոտություն», բայցև վստահեցրել՝ մեղավորները հայտնաբերվելու և պատժվելու են։

«Մարզի ոստիկանապետն ու իմ տեղակալը վաղ առավոտյան եղել են դեպքի վայրում, գրածները մաքրել ենք տվել։ Հիմա ճշտում ենք՝ ում տանը տեսախցիկներ կան, որ կարող է նկարած լինեն, որ տեսագրությունները նայենք ու մեղավորներին գտնենք։ Տանը վնաս չի հասցվել, ուղղակի մարդիկ «լակոտություն» են արել», – ասել է Ավետիսյանը։

«Հարձակման» պահին տանը մարդ չի եղել․ բնակիչները օրեր առաջ 14-օրյա ժամկետով հոսպիտալացվել կամ մեկուսացվել էին։ Լուսանկարներից երևում է, որ գրառումները թողել են մեծ և հայաստանյան մասշտաբներով բավականին շքեղ առանձնատան պարիսպների։