Նիդերլանդները պատժում են Ալիևին, նրա կնոջը և Թուրքիային

Նիդերլանդների խորհրդարանը հավանություն է տվել Ադրբեջանի բարձրաստիճան պաշտոնյաների և Թուրքիայի դեմ պատժամիջոցներ սահմանելու մասին առաջարկին։

Ֆեյսբուքի իր էջում գրել է Նիդերլանդներում Հայաստանի դեսպան Տիգրան Բալայանը։

Խոսքը Ադրբեջանի նախագահ Իլհամ Ալիևի և նրա կնոջ՝ փոխնախագահ Մեհրիբան Ալիևայի դեմ անհատական պատժամիջոցների մասին է՝ պայմանավորված «Լեռնային Ղարաբաղի դեմ Ադրբեջանի բռնություններով և պատերազմական հանցագործություններով»։

Պատժամիջոցներ են սահմանվել նաև ղարաբաղյան պատերազմում Ադրբեջանին ռազմական աջակցություն ցուցաբերած Թուրքիայի նկատմամբ՝ սպառազինության մատակարարման էմբարգոյի տեսքով: