Երևան և Ստեփանակերտ․ հայ ղարաբաղցիները չեն կարող լինել Ադրբեջանի քաղաքացի

Արցախի Հանրապետությունը չի կարող լինել Ադրբեջանի մաս, չի կարող լինել որևէ ինտեգրում, մեր ժողովուրդը չի կարող ապրել մեր սեփական երկրում որպես «Ադրբեջանի քաղաքացի», թվիթրեի իր էջում գրել է Ղարաբաղի նախագահի աշխատակազմի ղեկավար Արտակ Բեգլարյանը։

«Մեր իրացված ինքնորոշման իրավունքը պետք է ամբողջությամբ և միջազգային մակարդակով ճանաչվի», —հավելել է արցախցի պաշտոնյան։

Կարգավիճակի հարցին այսօր անդրադարձել է նաև Հայաստանի արտգործնախարար Արա Այվազյանը։

Զինադադարի մասին նոյեմբերի 9-ի եռակողմ հայտարարությունը, ըստ Այվազյանի, ուրվագծում է այդ պահին առկա իրավիճակը՝ գիտակցումով, որ ղարաբաղյան հակամարտության վերջնական կարգավորման հարցը դեռևս լուծված չէ։

«Այդ կարգավորման հիմքում, առաջին հերթին, պետք է դրված լինի Արցախի կարգավիճակի սահմանումը։ Ղարաբաղյան հակամարտության էությունը Արցախի ժողովրդի ինքնորոշման իրավունքի հարցն է: Այս իրավունքը չի կարող ճնշվել կամ սառեցվել ուժի միջոցով», – РИА-новости ռուսական պետական գործակալության հետ զրույցում նշել է Այվազյանը։

Արտգործնախարարն ընդգծել է՝ Հայաստանը հանդես է եկել և հետագայում էլ հանդես է գալու Արցախի ժողովրդի՝ ինքնորոշման և անվտանգության իրավունքների ճանաչման դիրքորոշմամբ:

«Ոչ մի կարգավիճակով և ոչ մի պայմանով Արցախը չի կարող լինել Ադրբեջանի իրավասության ներքո: Վերջին ագրեսիան ևս մեկ անգամ ապացուցեց, որ Ադրբեջանի կազմում Արցախը կնշանակի Արցախն առանց հայերի», — ասել է Այվազյան։