Դուրս գալ ՀԱՊԿ-ից, տեղափոխվել Սիսիան, դիմել ՆԱՏՕ-ին և ոչ միայն․ ՊԿ

Սյունիքում ստեղծված սպառնալից վիճակի առնչությամբ Պահպանողական կուսակցության նախագահ Միքայել Հայրապետեանը Կառավարությանը կոչ է անում.

1․ Հավաքական անվտանգության պայմանագրի կազմակերպության կողմից անհապաղ միջամտության բացակայության կամ հարցի ձգձգման քաղաքականություն վարելու պարագայում մեկշաբաթյա ժամկետում սկսել այդ կառույցից Հայաստանի Հանրապետության դուրս գալու գործընթաց:

2․ Միջպետական ռազմական պայմանագրերով նախատեսված պարտավորությունների անհապաղ կատարման պահանջով պաշտոնապես դիմել Ռուսաստանի Դաշնությանը, իսկ ձգձգման պարագայում մեկշաբաթյա ժամկետում սկսել Ռուսաստանի հետ ռազմական միջպետական պայմանագրերի վերանայման գործընթաց:

3․ Ռազմաքաղաքական աջակցության, ինչպես նաև Հայաստանի ու Ադրբեջանի սահմանի երկայնքով սկանդինավյան խաղաղապահների տեղաբաշխման խնդրանքով պաշտոնապես և հրապարակավ դիմել ԵԱՀԿ-ին և ՆԱՏՕ-ին:

4․ Գումարել օրենքի ուժով լուծարված, սակայն պարտականությունների կատարման լիազորությունները պահպանած ԱԺ հատուկ նիստ և օրենքի ընդունմամբ սառեցնել Փաշինյան-Պուտին-Ալիև հայտարարության՝ Հայաստանի բոլոր պարտավորությունների կատարումը:

5․ Երկրում հայտարարել ռազմական դրություն և համընդհանուր մոբիլիզացիա:

6․ Անմիջապես զինաթափել և ՀՀ դատարանի առջև կանգնեցնել ՀՀ սահմանն ապօրինաբար հատած ադրբեջանական զինվորականներին՝ չբացառելով Ադրբեջանում պահվող հայազգի պատանդների հետ նրանց փոխանակման հնարավորությունը:

7․ Վարչապետի գլխավորությամբ Կառավարությունն ամբողջ կազմով տեղափոխել Սիսիան քաղաք և Սիսիանից կառավարել երկիրը, ընդունել ու ճանապարհել արտասահմանյան պատվիրակություններին, քանի դեռ թեկուզ կես մետրի չափ ՀՀ տարածքի մեջ խորացած ադրբեջանական զինվորական կա: