«Կրքերը բորբոքելու պատճառ չեմ տեսնում»․ Լավրովը՝ Սյունիքի մասին

Ռուսաստանի արտգործնախարար Սերգեյ Լավրովը Սյունիքում ստեղծված իրավիճակի պատճառով «կրքերը բորբոքելու» պատճառ չի տեսնում։

«Որևէ կրակոց չի հնչել, որևէ բախում այնտեղ տեղի չի ունեցել: Հանգիստ նստել և քննարկել են, թե ինչպես հանգուցալուծեն իրավիճակը: Մեզ խնդրեցին օգնել, մեր զինվորականներ օգնեցին, համաձայնությունն իրագործված է։ Չեմ տեսնում կրքերը բորբոքելու որևէ պատճառ այս ոչ ամենօրյա, բայց հանգիստ կարգավորվող հարցում»,- նշել է նախարարը՝ Սիեռա-Լիոնեի իր գործընկեր Դեյվիդ Ջոն Ֆրենսիսի հետ համատեղ ասուլիսի ընթացքում։

Լավրովը նաև հայտնել է, որ Մոսկվան պատրաստ է դեմարկացիայի և դելիմիտացիայի հարցում օգնել Ադրբեջանին և Հայաստանին․

«Միջադեպից հետո ադրբեջանական կողմը հայտարարություն է տարածել՝ տեղի ունեցածը թյուրիմացությամբ է, և որ ամենակարևորն է՝  դելիմիտացիայի և դեմարկացիայի ենթարկված սահմանի բացակայությամբ պատճառաբանելով։ Ոչ ոք երբեք դրանով չի զբաղվել, և մենք առաջարկել ենք, որ կողմերն աշխատեն այդ ուղղությամբ։ Մենք պատրաստ ենք նրանց աջակցել քարտեզներով ու խորհրդատվական ծառայություններով»,- նշել է պաշտոնյան։

Ավելի վաղ խնդրին անդրադարձել էր նաև Ռուսաստանի նախագահ Վլադիմիրի Պուտինի մամուլի խոսնակ Դմիտրի Պեսկովը;

Պեսկովը նշել էր, որ ռուս նախագահի համոզմամբ՝ Լեռնային Ղարաբաղի վերաբերյալ եռակողմ համաձայնագրերի իրագործումն «այլընտրանք չունի» և հավելել, որ «այժմ ակտիվ ջանքեր են գործադրվում՝ լարվածությունը թուլացնելու և սահմանին իրավիճակը շտկելու համար»։

Հիշեցնենք, որ մայիսի 12-ին Ադրբեջանի զինվորականները հատել են Հայաստանի պետական սահմանը Սյունիքի մարզի Սև լճի հատվածում և փորձել պարփակել լիճը, որի մոտ 30 տոկոսը գտնվում է ադրբեջանական և մոտ 70 տոկոսը՝ հայկական վերահսկողության ներքո։ Ըստ Հայաստանի վարչապետի պաշտոնակատար Նիկոլ Փաշինյանի՝ ռազմական բախում թեև չի եղել, սահմանամերձ տարածքում 6 օր շարունակ բանակցություններ են ընթանում։ Ադրբեջանական կողմը ներթափանցել է նաև Գեղարքունիքի ուղղությամբ։ Երկու օր լռելուց հետո Բաքուն կոչ է արել հայկական կողմին «խուճապի չմատնվել», քանի որ ադրբեջանական զինվորներն «ուղղակի զբաղեցնում են իրենց դիրքերը»։

Մայիսի 13-ի Անվտանգության խորհրդի նիստին Փաշինյանը հայտարարել է, որ Հայաստանը որոշել է դիմել ՀԱՊԿ-ին, ինչպես նաև Պուտինին՝ ռազմական օգնության համար։