Սահմանին լարված է․ Բաքուն հայտնում է երկու վիրավորների և նոր գերիների մասին

15։01— Ժամը 14-ի դրությամբ իրադրությունը հայ-ադրբեջանական սահմանի արևելյան ուղղությամբ շարունակում է լարված մնալ, հաղորդել է պաշտպանության նախարարությունը։

Հակառակորդը, ըստ ՊՆ-ի, կիրառում է հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։

«Ժամը 13։00-ի սահմաններում, ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։ ՀՀ ԶՈՒ ստորաբաժանումները դիմել են պատասխան գործողությունների՝ հակառակորդի առաջխաղացումը կանխելու նպատակով», – ավելի վաղ տեղեկացրել է կառույցը։

Ըստ պաշտոնական Բաքվի՝ ադրբեջանցի երկու զինծառայող է վիրավորվել, հայ զինծառայողները զինաթափվել և գերեվարվել են։ Հայկական կողմն այս հաղորդմանը դեռ չի արձագանքել։

թարմացում․ 15։15 — Ժամը 14։30-ի դրությամբ իրադրությունը ՀՀ արևելյան սահմանագոտում շարունակում է ծայրահեղ լարված մնալ։

ՊՆ․ «Ընթանում են տեղային մարտեր, որոնց ընթացքում հակառակորդը կիրառում է հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ Հայկական կողմից իրականացվում են համարժեք գործողություններ։ Իրադրությունը վերահսկվում է ՀՀ զինված ուժերի կողմից»։