Նարեկ Մալյանի նկատմամբ խափանման միջոց է ընտրվել չհեռանալու մասին ստորագրությունը

Նախկին ոստիկանապետ Վովա Գասպարյանի նախկին խորհրդական Նարեկ Մալյանի նկատմամբ խափանման միջոց է ընտրվել չհեռանալու մասին ստորագրությունը։ «Բաց հասարակության հիմնադրամներ-Հայաստան»-ի գրասենյակի աշխատակիցների նկատմամբ բռնության կոչերի հիմքով 2020-ի դեկտեմբերի 28-ին հարուցված քրեական գործը քննվում է Երևան քաղաքի ընդհանուր իրավասության դատարանում։

Քրեական գործը հարուցվել էր Հելսինկյան քաղաքացիական ասամբլեայի Վանաձորի գրասենյակի հաղորդման հիման վրա՝ ՀՀ քրեական օրենսգրքի 226․2 հոդվածի 1-ին մասով և 2-րդ մասի 1-ին կետով (Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը՝ մի խումբ անձանց կողմից նախնական համաձայնությամբ կամ կազմակերպված խմբի կողմից):

Հիմքում Բաց հասարակության հիմնադրամների գրասենյակի մոտ Նարեկ Մալյանի արած հետևյալ հայտարարությունն է․ «Էս գրասենյակի աշխատակիցների պատասխանատվությունը ընդամենը օրեր անց տեղի ա ունենալու և ամենախիստ ձևով, օրեր անց, ես դա ձեզ խոստանում եմ։ Ես ամբողջ կյանքս ու ամբողջ գործունեությունս նվիրելու եմ ձեր նման պիղծերին պատասխանատվության կանչելու, սատկացնելու, մա՛հ դավաճաններին»։ Այս հայտարարությունը Մալյանն արել է մի խումբ անձանց հետ ԲՀՀ-Հայաստանի գրասենյակի մոտ կարմիր ներկ լցնելուց հետո։

Երևան քաղաքի ընդհանուր իրավասության դատարանը, դատավոր Վարդան Գրիգորյանի նախագահությամբ, գործը նշանակել է դատաքննության։

Նույն քրեական գործի շրջանակում քննվում են նաև Հայաստանի վարչապետ Նիկոլ Փաշինյանի և իշխանության այլ անդամների նկատմամբ քաղաքական հայացքներով պայմանավորված, դիտավորությամբ հրապարակայնորեն բռնությունը՝ սպանությունը, արդարացնելու՝ Նարեկ Մալյանի և նրա աջակիցների գործողությունները։