Բրյուսովի համալսարանի շրջանավարտի ռադիոպիեսը՝ BBC-ի մրցույթի լավագույն 7 աշխատանքների ցանկում
Սեդա Ստեփանյանի «Իսկ արևը շարունակում էր լկտիաբար շողալ» ռադիոպիեսը Բրիտանական խորհրդի և BBC-ի համաշխարհային ծառայության Ռադիոպիեսների միջազգային 23-րդ մրցույթում ընդգրկվել է լավագույն 7 աշխատանքների ցանկում:
BBC-ի համաշխարհային ծառայությունն այս տարի ստացել էր 1000-ից ավելի ռադիոպիեսներ աշխարհի տարբեր անկյուններից: Ամենամյա մրցույթում հաղթող են ճանաչվում երկու հեղինակ երկու անվանակարգում` անգլերենը որպես մայրենիով գրված ռադիոպիես և անգլերենը՝ որպես օտար լեզվով գրված ռադիոպիես: Հաղթողները մեկնում են Միացյալ Թագավորություն, արժանանում դրամական պարգևի և հետևում իրենց պիեսի բեմադրմանն ու հեռարձակմանը BBC-ի համաշխարհային ծառայությամբ, հաղորդում է Բրիտանական խորհրդի հայաստանյան գրասենյակը:
«Այս տարի հատուկ այս մրցույթի համար գրել եմ «Իսկ արևը շարունակում էր լկտիաբար շողալ» ռադիոպիեսը, որը հիմնված է մեծամասամբ իրական դեպքերի վրա և կյանքի ու սիրո մասին է Ղարաբաղյան պատերազմի ընթացքում: Պիեսը առանձնանում է այն բանով, որ ներկայացնում է հայկական սովորույթներն ու կյանքը փոքրիկ սահմանամերձ գյուղում»,- ասել է Սեդա Ստեփանյանը:
Սեդան ավարտել է Երևանի Բրյուսովի անվան պետական լեզվաբանական համալսարանը, այժմ պրակտիկա է անցնում «Ազատություն» ռադիոկայանում: Իսկ դեկտեմբերին Երևանի պետական կամերային թատրոնում Գոռ Մարգարյանը կբեմադրի նրա հեղինակած «Ստրիպտիզ» պիեսը: Ասում է, որ Բրիտանական խորհրդի և BBC-ի համաշխարհային ծառայության Ռադիոպիեսների միջազգային մրցույթի համար գրված պիեսը նվիրել է իր համար թանկ մարդու, ում այլևս երբեք չի հանդիպի:
Մրցույթին Սեդան մասնակցել է նաև նախորդ տարի` ներկայացնելով «Մահվան սպասումով» ռադիոպիեսը և կրկին ընդգրկվելով լավագույնների ցանկում: 2011 թվականին մասնակցել է Բրիտանական խորհրդի Նա/Նե լրագրողական մրցույթին` արժանանալով առաջին մրցանակին լավագույն ուսանողական աշխատանք անվանակարգում` «Չեմ լռի» հարցազրույց-մենախոսության համար:
BBC-ի համաշխարհային ծառայության Ռադիոպիեսների միջազգային մրցույթի վերջնական արդյունքները հայտնի կլինեն տարեվերջին:
Լուսանկարը՝ Սեդա Ստեփանյանի Facebook-ի էջից
