Հայաստանի ազգային անվտանգության ծառայությունը պարզել է, որ երկրի չափահաս քաղաքացին, Facebook-ում ներկայանալով իբրև ադրբեջանցի, կապ է հաստատել պատերազմում անհետ կորած համարվող զինծառայողների քույրերի, կանանց, ծնողների հետ, որոնց թվում եղել է նաև 16 տարին չլրացած մեկ երեխա, սուտ տեղեկություններ հայտնել նրանց հարազատի գտնվելու վայրի ու պահման պայմանների մասին, հավելյալ տեղեկության դիմաց էլ պահանջել է իր էջին ուղարկել մերկ լուսանկարներ և տեսագրություններ՝ հակառակ դեպքում սպառնալով սպանել կամ բռնություն գործադրել նրա նկատմամբ:
Այսպիսով սոցիալական ցանցի՝ նշված օգտատերը կատարել է մարդկանց, այդ թվում՝ 16 տարին չլրացած երեխայի շահագործում, որը դրսևորվել է մի խումբ անձանց շահագործման վիճակի մեջ դնելով՝ կյանքի կամ առողջության համար վտանգավոր բռնություն գործադրելու սպառնալիքով, ինչպես նաև վիճակի խոցելիությունն օգտագործելու միջոցով:
Վերը նշված դեպքերի առթիվ համապատասխան հոդվածներով հարուցված քրեական գործի շրջանակներում բերման է ենթարկվել Facebook-ում «Ազիզ Մուրադով» տվյալներով գրանցված քաղաքացին, ով ձերբակալվել և տվել է խոստովանական ցուցմունքներ: Որպես խափանման միջոց ընտրվել է կալանավորումը։
ԱԱԾ-ի հավաստմամբ՝ կան գործով շուրջ մեկ տասնյակ տուժողներ։
