«Պատգամավորը պետք է ներողություն խնդրի լրագրողից». Բաց նամակ Հովիկ Աբրահամյանին

40 հայաստանցի լրագրողներ բաց նամակ են ուղղել ԱԺ նախագահ Հովիկ Աբրահամյանին՝ խնդրելով նրան կարգի հրավիրել այն ԱԺ պատգամավորներին, ովքեր անվայել վարք են ցուցաբերում լրագրողների հետ շփվելիս:

«Զորօրինակ, վերջին թարմ դեպքը, երբ Հանրապետական խմբակցության պատգամավոր Մհեր Սեդրակյանը, ով հայտնի է որպես Թոխմախի Մհեր, անվայել խոսքեր է ասել «Ա1+» լրատվամիջոցի լրագող Մհեր Արշակյանի հասցեին՝ ասելով. «Դավա՜յ, դավա՜յ, յալլա՜, կտամ ծնոտդ կպոկեմ» (այդ ամենը տեսաձայնագրված է):

Խնդրում ենք կարգի բերել Մհեր Սեդրակյանին, ինչպես նաև Սամվել Ալեքսանյանին, ովքեր խորհրդարանում աշխատող լրագրողների հետ իրենց թույլ են տալիս շփվել ոչ հարգալից արտահայտություններով՝ «քուր ջան, ազիզ ջան» և այլն»,- ասված է նամակի մեջ:

Հիշեցնենք, որ Մհեր Սեդրակյանը լրագրողի՝ հարցերին պատասխանելու խնդրանքին հետևյալ արձագանքնելով նաև ասել էր. «Արդեն կապներդ կտրվել ա, սանձներդ թողեցիք, ընգաք արդեն: Դե գնա, լավ»:

Facebook սոցիալական ցանցում ստեղծված «Լրագրողների նամակ պանաջը Հովիկ Աբրահամյանին» խմբի անդամները նաև պահանջում են, որպեսզի պատգամավորը ներողություն խնդրի լրագրողից:

Հիշեցնենք, որ այս տարվա մարտին Մհեր Սեդրակյանը նմանատիպ արտահայտություն էր թույլ տվել նաև «Հայկական ժամանակ» օրաթերթի լուսանկարչի հետ զրույցում:

Լուսանկարը՝ ՖՈՏՈԼՈՒՐ