Հայաստանը ռուսական ուժերի հսկողության տակ գտնվող Պերմյակովին փոխանցեց Ռուսաստանի Դաշնությանը

Հայաստանի Հանրապետությունը որոշում է կայացրել 2015 թվականին Գյումրիիում բնակվող Ավետիսյանների ընտանիքի 7 անդամների սպանության համար ցմահ ազատազրկման դատապարտված ռուսաստանցի զինծառայող Վալերի Պերմյակովին արտահանձնել Ռուսաստանի Դաշնությանը: Այս մասին հայտնում է ՀՀ արդարադատության նախարարությունը։

«Շիրակի մարզի ընդհանուր իրավասության առաջին ատյանի դատարանի 2016 թվականի օգոստոսի 23-ի դատավճռի կատարումն ապահովելու գործընթացի շրջանակներում «Պատժի հետագա կրման համար ազատազրկման դատապարտվածներին փոխանցելու մասին» 1998թ. Մոսկվայի կոնվենցիայով սահմանված կարգով Վ. Պերմյակովի փոխանցումը Ռուսաստանի Դաշնություն իրականացվել է 18.05.2017թ.:

ՌԴ իրավասու մարմինների հետ անցկացված խորհրդակցությունների արդյունքում ձեռք է բերվել պայմանավորվածություն հայկական կողմի ներկայացուցիչների համապատասխան հարցումների դեպքում Վ. Պերմյակովի պատժի կատարման վերաբերյալ հետագայում տեղեկատվություն տրամադրելու մասին:

Հիշեցնենք, որ ՀՀ արդարադատության նախարարություն էր ստացվել Ռուսաստանի Դաշնության դատարանի որոշումը Շիրակի մարզի ընդհանուր իրավասության առաջին ատյանի դատարանի կողմից 2016 թվականի օգոստոսի 23-ին կայացված դատավճիռը ճանաչելու և Ռուսաստանի Դաշնության տարածքում կատարելու մասին:

ՌԴ դատարանի որոշումը երաշխավորում է ՀՀ դատարանի կողմից ցմահ ազատազրկման դատապարտված ՌԴ քաղաքացի Վալերի Պերմյակովի դատավճռի կատարումը անվերապահորեն ու լիովին՝ Հայաստանի Հանրապետության և Ռուսաստանի Դաշնության միջև գործող միջազգային պայմանագրերով սահմանված կարգով», – ասված է ՀՀ արդարադատության նախարարության կողմից այսօր տարածած հայտարարության մեջ:

Նշենք, որ Վալերի Պերմյակովը իր ձերբակալման օրվանից գտնվել է Գյումրիում տեղակայված Ռուսաստանի Դաշնության 102-րդ ռազամկայանում՝ ռուսաստանյան ուժերի հսկողության տակ: Անգամ դատական նիստերն անցկացվել են ռազմակայանի տարածքում: