«Սասնա ծռերի» աջակիցները երկկողմանի փակ են պահում Արշակունյաց պողոտան

«Սասնա ծռեր» խմբի աջակիցները երեկվանից շարունակում են երկկողմանի փակ պահել Արշակունյաց պողոտան։ Այն բանից հետո, երբ երեկ Շենգավիթի ընդհանուր իրավասության դատարանում դատավոր Մեսրոպ Մակյանը հրաժարվել է փոխել խմբի անդամների խափանման միջոցը, նրանց աջակիցները վրաններ են խփել դատարանի առջև և մեքենաներով փակել Արշակունյացը։ Մոտ երեք տասնյակ մարդ գիշերել է փողոցում խփած վրաններում։ Վրանների կողքին բողոքողները պաստառ են փակցրել, որի վրա գրված է․ «Ազատություն քաղբանտարկյալներին և «Սասնա ծռերին»»։

Մեր թղթակցի հետ զրույցում գիշերը պողոտայում մնացած մադրիկ պատմել են տեղի ունեցած միջադեպի մասին։ Mercedes մակնիշի մի մեքենա արագությամբ մոտեցել է ճանապարհը փակած երկու մեքենաներին, փորձել է շրջանցել, բայց, բավարար տեղ չլինելու պատճառով, հարվածել է նրանց։ Այդ պահին մեքենայի անիվը պայթել է. Mercedes֊ն իներցիայով շարժվել է մի քանի մետր և կանգնել անմիջապես վրանների մոտ։ Ականատեսները պատմում են, որ տեղում գտնվող ոստիկանները ստուգելուց հետո հայտնել են, որ վարորդի արյան մեջ ալկոհոլի պարունակությունը գերազանցել է սահմանված չափը։ Մեքենան ավտոքարշակով հեռացվել է։ Դեպքը քննարկող մարդիկ նշում էին, որ անիվը չպայթելու դեպքում վթարը կարող էր ողբերգական ավարտ ունենալ։

Հիշեցնենք, որ 2016 թվականի հուլիսի 17-ին «Սասնա ծռեր» խմբի մոտ 3 տասնյակ անդամներ գրավել էին ՀՀ ոստիկանության ՊՊԾ գունդը՝ պահանջելով ազատ արձակել քաղբանտարկյալներին, ինչպես նաև Սերժ Սարգսյանի հրաժարականը։ Երկու շաբաթ գնդի տարածքը պահելուց հետո նրանք վայր էին դրել զենքերը։